وزیراعظم محمد نواز شریف تین روزہ سرکاری دورہ پر ہانگ کانگ پہنچ گئے۔
وزیراعظم محمد نواز شریف ہانگ کانگ کے تین روزہ سرکاری دورہ پر منگل کو یہاں پہنچ گئے۔ ہانگ کانگ میں اپنے قیام کے دوران وزیراعظم نواز شریف ون بیلٹ ون روڈ ۔ پاکستان سرمایہ کاری فورم سے خطاب کریں گے جس میں ہانگ کانگ اور چین کی بڑی کاروباری کمپنیاں شرکت کریں گی۔ اس میں پاک چین اقتصادی راہداری کے ابھرتے ہوئے کاروباری مواقع کو اجاگر کرنے پر توجہ مرکوز ہوگی۔ چیف ایگزیکٹو ہانگ کانگ سی وائی لیونگ بھی فورم سے خطاب کریں گے۔ سرمایہ کاری فورم کا اہتمام ہانگ کانگ میں پاکستانی قونصل جنرل نے ہانگ کانگ کی حکومت کے اشتراک کار سے کیا ہے۔ وزیراعظم یہاں قیام کے دوران 17 مئی کو ہانگ کانگ کے چیف ایگزیکٹو سے ملاقات کریں گے جس میں پاکستان اور ہانگ کانگ کے درمیان دوطرفہ روابط بالخصوص بیلٹ اینڈ روڈ منصوبوں پر بات چیت ہوگی۔ وزیراعظم ہانگ کانگ اور چین کی ممتاز کمپنیوں کے سربراہان سے بھی ملیں گے۔ وہ ہانگ کانگ میں اپنے قیام کے دوران ہانگ کانگ کی منتخب چیف ایگزیکٹو مسز کیری لام سے بھی ملاقات کریں گے۔
