مصر میں کورونا کو امریکی افواہ قرار دینے والا 29 سالہ شخص خود کورونا وائرس سے  جاں بحق  ہو گیا۔غیر ملکی خبر رساں ا دارے  کے مطابق سیاحت کے شعبے سے وابستہ محمد واحدان نے چند ماہ قبل فیس بک پر اپنے ویڈیو پیغام میں کورونا وائرس کو جھوٹ قرار دیا تھا۔انہوں نے کہا تھا کہ امریکہ نے چین کی معیشت کو برباد کرنے کے لیے افوا پھیلائی ہے۔ محمد واحدان نے مصری عوام پر زور دیا تھا کہ وہ معمولات زندگی کو بحال رکھیں اور ذخیرہ اندوزی سے گریز کریں تاہم کچھ عرصے بعد محمد واحدان میں وائرس کی تشخیص کے بعد انہیں مصر کے  ہسپتا ل میں قرنطینہ کر دیا گیا تھا۔دوران قرنطینہ محمد واحدان نے ایک اور ویڈیو پوسٹ کرتے ہوئے اپنی غلطی کا اعتراف کیا اور ساتھ ہی لوگوں کو گھروں میں رہنے کی تلقین کی تھی۔محمد واحدان  نے کہا  کہ بھوک آپ کو نہیں مارے گی اس لیے اپنی زندگی دا ئوپر مت لگائیں، محمد واحدان کی جانب سے پوسٹ کی گئی آخری ویڈیو میں وہ بمشکل بول پا رہے تھے۔مصر میں کورونا سے ہونے والی اموات کی تعداد 590 سے زائد ہو چکی ہے جبکہ متاثرہ افراد کی تعداد 11 ہزار سے زائد ہے۔واضح رہے کہ دنیا بھر میں کورونا وائرس سے اموات کی تعداد 3 لاکھ 6 ہزار سے تجاوز کر چکی ہے۔ عالمی سطح پر کورونا سے متاثرہ افراد کی تعداد 46 لاکھ 28 ہزار سے زائد ہو گئی ۔ پوری دنیا میں اب تک اپنے یقین، مضبوط قوت ارادی اور طاقتور مدافعتی نظام کی بدولت 17 لاکھ 58 ہزار سے زائد افراد کورونا کو شکست بھی دے چکے ہیں۔خبر رساں ادارے کے مطابق امریکہ میں کورونا وائرس سے متاثرہ افراد کی تعداد 14 لاکھ 84 ہزار سے بڑھ گئی ہے جب کہ 88 ہزار 500 سے زائد اموات ریکارڈ کی جا چکی ہیں۔