ڈینگی کے پھیلاﺅ کے حوالے سے موجودہ موسم انتہائی حساس و خطرناک ہے، تمام اداروں اور عوام کو تدارکی اقدامات یقینی بنانے کی ہدایت
ڈینگی کے پھیلاﺅ کے حوالے سے موجودہ موسم انتہائی حساس و خطرناک ہے۔ لہٰذاتمام ادارے اور عوام فوری تدارکی اقدامات یقینی بنائیں نیز انسداد ڈینگی مہم سے وابستہ محکموں کے افسران وسٹافر اپنی آنکھیں کھلی رکھیں اور فیلڈ میں متحرک انداز میں کام کرتے ہوئے شہریوں میں ڈینگی سے بچاﺅ کےلئے صفائی ستھرائی و احتیاط کے بارے میں احساس اور آگہی کو یقینی بنائیں ۔علاوہ ازیں اس سلسلہ میں علماءکرام اور آئمہ حضرات بھی اپنے خطبات میں لوگوں کو ڈینگی کے خطرات اور اس سے بچاﺅ کے طریقوں سے آگاہ کریں۔ فیصل آبادڈویژنل انتظامیہ کے ترجمان نے انسداد ڈینگی کے بارے میں بتایا کہ ڈینگی سے بچنے کےلئے احتیاطی وحفاظتی اقدامات کو مزید تیز کیا جارہاہے اور اس سلسلے میں آٹھوں بازار، ویگنوں وبسوں کے اڈوں، کباڑ خانوں،پرائیویٹ ہسپتالوں، فیکٹریوں، قبرستانوں، پارکوں،گنجان آبادیوں،برساتی نالوں،نرسریوں،تعلیمی اداروں وڈسپنسرےوںاور دےگر ضروری مقامات کی باربار چےکنگ بھی کی جارہی ہے کیونکہ اس موسم میں سستی وعدم توجہی کی گنجائش نہیں۔انہوں نے واسا کو سیوریج سسٹم درست رکھنے،واٹر سپلائی کی لیکج کو دور کرنے اور کھڑے پانی کے خاتمے کی بھی ہدایت کی۔