اسلام آباد:حکومت نے پیپلز پارٹی کے چیرمین بلاول بھٹو زرداری اور وزیراعلی سندھ مراد علی شاہ کا نام ایگزٹ کنٹرول لسٹ(ای سی ایل) سے نکالنے کی منظوری دے دی۔وزیراعظم عمران خان کی زیر صدارت وفاقی کابینہ کا اجلاس ہوا ،جس میں 17 نکاتی ایجنڈے پر غور کیا گیا۔وفاقی وزیر قانون بیرسٹر فروغ نسیم نے وفاقی کابینہ کو سپریم کورٹ کے تحریری فیصلے کے قانونی نکات پر بریفنگ دی۔ذرائع کے مطابق وزیر قانون نے بتایا کہ سپریم کورٹ کے حکم پر عمل درآمد یقینی بنانا آئینی ذمہ داری ہے۔ذرائع کا کہنا ہے کہ وفاقی کابینہ کے اجلاس میں سپریم کورٹ کے احکامات پر عمل درآمد کرنے کی منظوری دی گئی۔اجلاس میں بلاول بھٹو اور مراد علی شاہ کے نام ای سی ایل سے نکالنے کا فیصلہ بھی کیا گیا۔وفاقی کابینہ اجلاس میں ایگزٹ کنٹرول لسٹ(ای سی ایل)پر قائم خصوصی کمیٹی کو دیگر 170 افراد کے نام سے متعلق ایف آئی اے اور نیب سے مشاورت کی ہدایت کی گئی ہے۔خیال رہے کہ وفاقی کابینہ نے منی لانڈرنگ کیس کی تحقیقات کرنے والی جے آئی ٹی کی سفارش پر بلاول بھٹو اور مراد علی شاہ سمیت 172 افراد کے نام ای سی ایل میں شامل کیے تھے۔بعد ازاں سپریم کورٹ نے بلاول بھٹو اور مراد علی شاہ کے نام ای سی ایل سے نکالنے کا حکم دیا تھا