وزیرخارجہ شاہ محمودقریشی کی امریکی سینیٹرلنزےگراہم سےملاقات،خطےکی مجموعی صورتحال پرتبادلہ خیال
تفصیلات کےمطابق دوران ملاقات وزیرخارجہ شاہ محمود قریشی نے پاکستان اور امریکہ کے مابین سٹرٹیجک شراکت داری کی تقویت و مضبوطی کے لئے حمایت پر سینیٹر لنزے گراہم کا شکریہ ادا کیا۔ اس موقع پرمخدوم شاہ محمود قریشی کاکہناتھا کہ صدر ڈونلڈ ٹرمپ اور وزیر اعظم عمران خان کے طویل المدتی اور وسیع بنیادوں پر استوار دوطرفہ تعلقات کے وژن کوسامنے رکھتے ہوئے دونوں ممالک کو زراعت ،تجارت اور سرمایہ کاری کے شعبوں میں دو طرفہ تعاون کو فروغ دینا ہو گا۔ وزیر خارجہ نے مشرق وسطی میں پائی جانے والی کشیدہ صورتحال پر قابو پانے کیلئے پاکستان کی طرف سے کی گئیں سفارتی کوششوں اور خطے کے مختلف ممالک کے وزرائے خارجہ سے ہونے والے روابط اور اپنے حالیہ دورہ ایران و سعودی عرب کی تفصیلات سے امریکی سینیٹر لنزے گراہم کو آگاہ کیا۔وزیرخارجہ کاکہنا تھا کہ پاکستان خطے میں قیام امن کے لئے اپنا مثبت کردار ادا کرنے کیلئے پر عزم ہے۔ پاکستان کو جلد ہی" بین الافغان" مذاکرات کےآغاز کی امید ہے اور فریقین کومتشدد رویوں میں کمی لانے کی ضرورت ہے۔