پاکستان سپر لیگ کے آخری گروپ میچ میں کراچی کنگز نے اسلام آباد یونائیٹڈ کو سات وکٹ سے شکست دے کر پلے آف مرحلے کے لیے کوالیفائی کرلیا
کراچی کنگز کے کپتان ایون مورگن نے ٹاس جیت کر اسلام آباد یونائیٹڈ کو پہلے بیٹنگ کی دعوت دی، اسلام آباد کی جانب سے جے پی ڈومینی اور الیکس ہیلز نے اننگز کا آغاز کیا لیکن عثمان شنواری نے دوسرے ہی اوور میں ڈومینی کو پویلین بھیج کر کراچی کو پہلی کامیابی دلوائی، وہ 4 رنز بناکر آؤٹ ہوئے،
محمد عرفان نے دوسرے اوپننگ بلے باز ہیلز کو بھی 11 رنز پر پویلین واپس بھیج کر کراچی کی میچ میں گرفت مضبوط کردی
اوپنرز کے جلد پویلین لوٹ جانے کے بعد کپتان مصباح الحق خود بیٹنگ کے لیے اوپر آئے اور چیڈوک والٹن کے ساتھ ملکر 29 رنز کی شراکت قائم کی لیکن شاہد آفریدی نے دونوں کھلاڑیوں کو پویلین واپس بھیج کر اسلام آباد کی پوزیشن مزید کمزور کردی، مصباح 19 اور والٹن 21 رنز بناکر آؤٹ ہوئے۔حسین طلعت بھی خاطر خواہ کارکردگی دکھانے میں ناکام رہے اور صرف ایک رنز پر ہی محمد عرفان کا شکار بنے جس کے بعد شاداب خان بھی 8 رنز کے مہمان ثابت ہوئے اور فہیم اشرف کی اننگز بھی 4 رنز تک محدود رہی۔ظفر گوہر 3 اور اسٹیون فن کوئی رنز نہ بناسکے جب کہ آصف علی نے ذمہ دارانہ بیٹنگ کا مظاہرہ کرتے ہوئے 34 رنز کی اننگز کھیلی اور آخری وقت تک وکٹ پر موجود رہے۔کراچی کی جانب سے عثمان شنواری نے 4، شاہد آفریدی اور محمد عرفان نے 2،2 جب کہ محمد عامر نے ایک وکٹ حاصل کی۔کراچی کنگز کی جانب سے خرم منظور اور جوئے ڈینلی نے اننگز کا آغاز کیا مگر خرم 15 رنز بنانے کے بعد پویلین واپس لوٹ گئے جس کے بعد بابر اعظم بیٹنگ کے لیے اور ڈینلی کے ساتھ ملکر 36 رنز کا اضافہ کیا۔
ڈینلی بھی 36 رنز کی اننگز کھیل کر فہیم اشرف کا شکار بنے جس کے بعد کپتان مورگن خود بیٹنگ کے لیے لیکن صرف 2 رنز کے مہمان ثابت ہوئے۔ کولم انگرام اور بابر اعظم نے بالترتیب 31 اور 29 رنز کی ناقابل شکست اننگز کھیل کر ٹیم کو فتح سے ہمکنار کروایا۔
دبئی میں پہلے پلے آف میچ میں اسلام آباد یونائیٹڈ اور کراچی کنگز 18 مارچ کو مدمقابل ہوں گے