پیراگون سکینڈل:گواہ جرح کیلئے دوبارہ طلب
لاہور کی احتساب عدالت نے پیراگون سکینڈل میں نیب کے گواہ کو جرح کے لئے دوبارہ طلب کرلیا۔ پیر کو لاہور کی احتساب عدالت میں پیراگون سکینڈل کیس کی سماعت ہوئی، لیگی رہنما خواجہ سعد رفیق اور خواجہ سلمان رفیق احتساب عدالت کے ایڈمن جج جواد الحسن کے روبرو پیش ہوئے۔ دوران سماعت امجد پرویز ایڈووکیٹ نے گواہوں کے بیان پر جرح کی۔نیب کے گواہ منیجر امپیریل گارڈن محمد سلیم نے بتایا کہ فروری 2017ء میں پیراگون اور امپیریل گارڈن کا اجلاس ندیم ضیا کے کہنے پر ہوا جس میں خواجہ سعد رفیق ثالث کے طور پر پیش ہوئے۔نیب کے دوسری گواہ اسلم گجر تحصیلدار نے بتایا کہ موضع پھلروان کا ستر سے اسی فیصد رقبہ پیراگون سٹی میں شامل ہوچکا ہے۔محکمہ مال شہری آبادی کے پلاٹ کی مالیت کا تخمینہ لگوانے کا کوئی اختیار نہیں ہے۔امجد پرویز ایڈووکیٹ نے بتایا کہ نیب نے تخمینہ پٹواری سے لگوایا ہوا ہے۔گواہ نے بتایا کہ خواجہ سعد اور سلمان رفیق نے چالیس کنال زمین، پچاس کنال زمین کے بدلے پیراگون سٹی سے حاصل کی۔ خواجہ برادران اسی زمین کے قابض ہیں جو انہیں پیراگون سٹی سے تبادلے میں ملی جبکہ چالیس کنال اراضی کو پیراگون نے بیس پلاٹ بناکر نمبر لگائے۔عدالت نے گرین سٹی کے مالک حاجی رفیق کے قبرستان پر قبضہ سے متعلق مصدقہ رپورٹ پیش کرنے کا حکم دیتے ہوئے سماعت 29 جنوری تک ملتوی کردی۔ عدالت نے نیب کے گواہ اسلم گجر کو آئندہ سماعت پر جرح کے لئے دوبارہ طلب کرلیا۔
