دونوں بھائی کان کھول کر سن لو! ہر ڈاکو کا وقت آ جاتا ہے، تم دونوں کا وقت آ گیا ہے: عمران خان
گوجرانوالہ: چیرمین پاکستان تحریک انصاف عمران خان نے کہا ہے کہ امریکی سازش کے تحت بڑے بڑے ڈاکوؤں کو اکھٹا کردیا گیا، یہ بڑے بڑے مافیاز لوگوں کا خون چوستے ہیں، ہم ایک قوم بن کر ان کا مقابلہ کریں گے اور انہیں شکست دیں گے، ہم نے نکل کر سازش کرنے والوں کو بتانا ہے کہ ہم زندہ اور آزاد قوم ہیں۔ انہوں ںے یہ بات پی ٹی آئی کے زیر اہتمام منعقدہ جلسہ عام سے خطاب کرتے ہوئے کہی۔ انہوں نے کہا کہ میرا گوجرانوالہ اسلام آباد مارچ کے لیے تیار ہے، پاکستان کے بڑے بڑے ڈاکو ایک طرف کھڑے ہو گئے ہیں، میں اللہ کا شکر ادا کرتا ہوں، اس کو انقلاب کہتے ہیں۔
سابق وزیراعظم نے کہا کہ 21 سال کرکٹ کھیلی کبھی اسٹیڈیم میں اتنے لوگ نہیں دیکھے، مجھے اندازہ ہی نہیں تھا کہ گوجرانوالہ میں اتنی تعداد میں لوگ ہیں، گوجرانوالہ کے عوام کا شکریہ ادا کرتا ہوں، یہ سیاست نہیں ہورہی بلکہ انقلاب آرہا ہے، سارا بڑا مافیا، ڈاکو ایک طرف اور قوم دوسری طرف کھڑی ہوگئی ہے، بڑے ڈاکو، مافیاز کرپٹ سسٹم کے ذریعے لوگوں کا خون چوستے ہیں، ہم اس مافیا اور ڈاکوؤں کا مقابلہ کریں گے اور بری طرح شکست دیں گے۔
