"پاکستان پر حملے کے بعد کتنے بھارتی طیارے تباہ ہوئے؟" راہول گاندھی نے سوال اٹھا دیا

بھارتی اپوزیشن رہنما راہول گاندھی نے مودی حکومت کو ایک بار پھر آڑے ہاتھوں لیتے ہوئے اہم سیکیورٹی سوالات اٹھا دیے ہیں۔ ان کا کہنا ہے کہ پاکستان پر فضائی حملے کے بعد بھارتی فضائیہ کو جو نقصان ہوا، اس کی تفصیلات قوم سے کیوں چھپائی جا رہی ہیں؟ تفصیلات کے مطابق انہوں نے یہ سوال بھارتی وزیر خارجہ جے شنکر کے اس بیان کے بعد اٹھایا جس میں انہوں نے تسلیم کیا کہ حملے سے قبل پاکستان کو مطلع کیا گیا تھا۔ راہول گاندھی کا کہنا تھا کہ اگر واقعی حملے سے پہلے پاکستان کو آگاہ کیا گیا تو یہ ایک سنگین سیکیورٹی معاملہ ہے، اور عوام کو بتایا جائے کہ ایسا کرنے کا اختیار کس نے دیا؟ انہوں نے الزام لگایا کہ حکومت کی یہ پالیسی ملکی سلامتی کے خلاف ہے۔ انہوں نے مزید کہا کہ وزیر خارجہ کا یہ اعتراف تشویش ناک ہے اور اس پر خاموشی اختیار نہیں کی جا سکتی۔ ساتھ ہی انہوں نے یہ بھی جاننے کا مطالبہ کیا کہ حملے کے بعد بھارتی فضائیہ کو کس قدر نقصان پہنچا؟ واضح رہے کہ جے شنکر کے بیان نے نہ صرف سیاسی بلکہ عسکری حلقوں میں بھی نئی بحث چھیڑ دی ہے۔