کابل میں 2 بم دھماکے،1شخص ہلاک، 6 زخمی
افغان دارالحکومت کابل میں 2 بم دھماکوں کے نتیجے میں ایک شخص ہلاک اور 6 زخمی ہوگئے،دوسری جانب افغان فورسز کی کابل میں کارروائی کے نتیجے میں داعش خراسان کا ایک کارکن ہلاک جب کہ متعدد دیگر کو گرفتار کرلیا گیا ۔افغان میڈیا کے مطابق دارالحکومت کابل میں 2 بم دھماکوں کے نتیجے میں ایک شخص ہلاک اور 6 زخمی ہوگئے، افغان وزیر داخلہ کے ترجمان نے بم دھماکوں کی تصدیق کرتے ہوئے کہا کہ پہلا دھماکا پولیس ضلع 13 میں ہوا جہاں 3 خواتین زخمی ہوگئیں جب کہ دوسرا دھماکا پولیس ضلع 3 میں ہوا جس میں ایک شخص جاں بحق ہوا۔ افغان حکام کے مطابق ابھی تک کسی بھی گروپ نے دھماکے کی ذمہ داری قبول نہیں کی ہے تاہم اس حوالے سے تحقیقات جاری ہیں، ممکنہ طور پر ان دھماکوں میں داعش خراساں ملوث ہے جس کے خلاف افغان فورسز کارروائیاں کررہی ہیں۔دوسری جانب جمعرات کو افغان فورسز کی کابل میں کارروائی کے نتیجے میں داعش خراسان کا ایک کارکن ہلاک ہوگیا جب کہ متعدد دیگر کو گرفتار کرلیا گیا ہے۔