وفاقی حکومت نے ملک میں پٹرولیم مصنوعات کی قیمتیں مقرر کرنے کا اپنا اختیار ختم کرنے کی تیاریاں شروع کر دی ہیں۔ ایک رپورٹ کے مطابق وفاقی حکومت عوام کی تنقید سے بچنے کیلئے پٹرولیم مصنوعات کی قیمتیں مقرر کرنے کا اختیار منتقل کرنے کی خواہاں ہے۔ رپورٹ کے مطابق پٹرولیم ڈویژن نے اوگرا کو ہدایت کی ہے کہ 3 روز میں پٹرولیم مصنوعات کی ڈی ریگولیشن پر تجزیہ اور مضمرات پر پریزنٹیشن پیش کی جائے۔پٹرول اور ہائی اسپیڈ ڈیزل کی قیمتوں کی ڈی ریگولیشن کا مطلب یکساں قیمتوں کا خاتمہ ہوگا جس کے بعد تیل کمپنیاں مختلف شہروں اور دیہاتوں کے لیے اپنی قیمتیں مقرر کرنے کے لیے آزاد ہو جائیں گی۔ بتایا گیا ہے کہ تیل کمپنیاں پہلے سے ہی فرنس آئل اور ہائی آکٹین کی قیمتیں سے مقرر کرتی ہیں، تیل کمپنیوں کو پٹرول، ڈیزل اور مٹی کے تیل کی قیمت بھی مقرر کرنے کا اختیار دینے کا مطلب یہ ہوگا کہ ہر شہر اور ہرآئل کمپنی کی مصنوعات کی قیمتیں مختلف ہوں گی۔