سندھ ہائیکورٹ نے پی ٹی آئی رہنما زہرہ شاہدکے قاتلوں کی سزائے موت عمر قید میں بدل دی
سندھ ہائی کورٹ نے پی ٹی آئی رہنما زہرہ شاہد کے قاتلوں کی سزائے موت کو عمر قید میں تبدیل کردیا، اے ٹی سی نے دونوں مجرموں کو موت اور جرمانے کی سزا سنائی تھی۔تفصیلات کے مطابق سندھ ہائی کورٹ میں پاکستان تحریک انصاف کی رہنما زہرہ شاہد قتل کیس میں ملزمان کی سزا کیخلاف اپیل پر سماعت ہوئی ، سماعت میں وکیل ملزمان نے کہاکہ میرے موکلین کیخلاف مقدمہ واقعہ کے9 دن بعددرج کیاگیا اور گواہوں کے بیانات میں تضاد ہے۔عدالت نے ملزمان کی سزا کیخلاف اپیل جزوی طورپرمنظور کرتے ہوئے سزائے موت کو عمر قید میں تبدیل کردیا۔پی ٹی آئی کی رہنما زہرہ شاہد کے قتل میں سزا پانے والے ملزمان راشدٹیلر، زاہد عباس زیدی نے سزا کے خلاف سندھ ہائی کورٹ میں اپیل کی تھی۔یاد رہے انسداد دہشت گردی کی عدالت نے ایم کیو ایم کے کارکنان راشد ٹیلر اور زاہد عباس کوجرم ثابت ہونے پر سزائے موت سنائی تھی جبکہ جبکہ 2 مزید ملزمان عرفان اور کلیم کو عدم ثبوت کی بنیاد پر بری کردیا تھا۔واضح رہے کہ پاکستان تحریکِ انصاف کی رہنما زہرہ شاہد کو عام انتخابات کے چند روز بعد 18 مئی 2013 کو ان کے گھر کے باہر قتل کیا گیا تھا، حکومت نے ملزمان کی نشاندہی کے لیے 25 لاکھ روپے انعام رکھا تھا۔
