پاک فضائیہ کا جانباز پائلٹ راشد منہاس شہید نشانِ حیدر کو خراجِ عقیدت پیش
اسلام آباد : پاک فضائیہ نے جانباز پائلٹ راشد منہاس شہیدنشان حیدر کو خراج عقیدت پیش کرتے ہوئے دستاویزی فلم جاری کر دی اور کہا راشد منہاس شہید ہماری آنے والی نوجوان نسلوں کے لیے مشعل راہ ہیں۔ تفصیلات کے مطابق پاک فضائیہ کے جانباز پائلٹ راشد منہاس کا 49 واں یوم شہادت منایا جارہا ہے ، پاک فضائیہ نے راشد منہاس شہید نشان حیدر کو خراج تحسین پیش کرتے ہوئے دستاویزی فلم جاری کر دی۔ ترجمان پاک فضائیہ نے کہا کہ 17 فروری 1951 کو کراچی میں جنم لینے والے راشد منہاس ملکی تاریخ کا ایک ایسا درخشاں ستارہ ہیں، جو آنے والی نسلوں کو اپنی روشنی سے منور کرتے رہیں گے، ملکی سرحدوں کی حفاظت کا جذبہ دل میں لیے راشد منہاس نے 14 مارچ 1971 کو پاک فضائیہ کے 51ویں جی ڈی پی کورس میں کمیشن حاصل کیا۔ بعد ازاں وہ آپریشنل کنورژن کورس کے لیے ماڑی پور (مسرور) میں تعینات نمبر 2 اسکواڈرن پہنچے، جہاں رب کائنات نے ان کے مقدر میں لا زوال رفعتیں لکھ رکھی تھیں، 20 اگست 1971 کے دن کراچی کی فضاؤں میں وہ ناقابل فراموش داستان شجاعت لکھی گئی، جسے راشد منہاس نے اپنے لہو سے رقم کیا ۔
