میلبورن ۔ 20 دسمبر (اے پی پی) آسٹریلوی ٹیم کے مایہ ناز اوپننگ بلے باز ڈیوڈ وارنر کو ٹیسٹ کرکٹ میں کیریئر کے 5 ہزار رنز مکمل کرنے کیلئے مزید 51 رنز درکار ہیں، توقع ہے کہ وہ پاکستان کے خلاف سیریز کے دوسرے ٹیسٹ میچ میں یہ سنگ میل عبور کر لیں گے۔ وہ یہ اعزاز پانے والے 19ویں آسٹریلوی بلے باز بن جائیں گے۔ کینگروز کی جانب سے ٹیسٹ میچز میں زیادہ رنز بنانے کا اعزاز رکی پونٹنگ کو حاصل ہے جنہوں نے 13378 رنز بنا رکھے ہیں۔ وارنر نے 2011ءمیں ٹیسٹ کیریئر کا آغاز کیا تھا اور اس وقت ان کا شمار دنیا کے بہترین بلے بازوں میں ہوتا ہے، انہوں نے 59 میچز کی 108 اننگز میں 4949 رنز بنا رکھے ہیں جس میں ان کی 16 شاندار سنچریاں اور 22 نصف سنچریاں بھی شامل ہیں اور اس بات کے قوی امکان ہیں کہ وہ پاکستان کے خلاف شروع ہونے والے پہلے ٹیسٹ میں پانچ ہزار رنزوں کا ہندسہ عبور کر لیں گے۔