پاکستانی خاتون کے مبینہ اغوا کی کوشش ناکام، چینی باشندہ گرفتار

اسلام آباد: نیو اسلام آباد ایئرپورٹ پرفیڈرل انوسٹی گیشن ایجنسی (ایف آئی اے) سے تعلق رکھنے والے امیگریشن حکام نے پاکستانی خاتون کے مبینہ اغوا کی کوشش ناکام بنادی۔ اغوا کی کوشش میں مبینہ طورپر ملوث چینی باشندے زوان لی زہنگ (Xuan Lezhang) کو گرفتار کرلیا گیا۔ ہم نیوز کو ذمہ دار ذرائع نے بتایا کہ سرگودھا سے تعلق رکھنے والی پاکستانی خاتون سلویا کو اس کے والد سے چینی شہری نے مبینہ طور پر چار لاکھ روپے کے عوض خریدا تھا۔ ایئرپورٹ پر جب امیگریشن حکام نے چینی باشندے سے اس کی دستاویزات دیکھ کر سوالات کیے تو وہ انہیں مطمئن کرنے میں ناکام رہا۔ ذرائع نے ہم نیوز کو بتایا کہ اسی دوران سلویا نے حکام کو بتایا کہ اس کے والد نے پانچ لاکھ روپے کے عوض اسے فروخت کیا ہے اور وہ اپنے والدین کے پاس جانا نہیں چاہتی ہے۔ سلویا نے والد پر یہ الزام بھی عائد کیا کہ اس سے قبل اسے ایک حبشی کو فروخت کیا گیا تھا۔ امیگریشن حکام کو سلویا نے یہ بھی بتایا کہ قطر ایئرپورٹ پر اس نے احتجاج کیا تھا جس پر وہاں کے حکام نے اسے پاکستان بھیجا ہے۔ ہم نیوز کے مطابق سلویا نے مؤقف اپنایا ہے کہ اگراسے دوبارہ والد کے پاس بھیجا گیا تو وہ ایک مرتبہ پھر فروخت کردی جائے گی۔ سرگودھا سے تعلق رکھنے والی سلویا نے حکام سے کہا کہ چینی شہری اسلام آباد میں پرکاش نامی پاکستانی کے ساتھ مل کر میرج بیورو کا کاروبار کرتا ہے۔ ایف آئی اے حکام نے سلویا اور چینی باشندے کو انسداد انسانی اسمگلنگ سیل منتقل کردیا ہے جہاں دونوں سے باقاعدہ تفتیش و تحقیق کی جائے گی تاکہ حقائق کی تہہ تک پہنچا جا سکے۔