محکمہ زراعت سندھ نے وفاقی حکومت کی طرف سے گندم کی امدادی قیمت 1800 روپے فی چالیس کلو گرام مقرر کرنے کے فیصلے کوکسان دشمن اور400 فیصد تاریخی اضافے کے بیان کوجھوٹا قراردیتے ہوئے کہا ہے کہ پی ٹی آئی حکومت کی گندم قیمت 1800روپے مقرر کرنا کسان دشمنی ہے۔ صوبائی وزیر   سندھ اسماعیل راہو نے اپنے ردعمل میں کہا کہ سندھ میں گندم کی فی من امدادی قیمت 2 ہزارروپے ہی برقرار رہے گی، گندم کی فی من قیمت 1800 روپے مقرر کرنے سے ملک میں بحران پیدا ہوگا، فیصلے کو مسترد کرتے ہیں۔انہوں نے کہا کہ زرعی مشینری، کھاد، بیج اور کیڑے مار ادویات کی قیمتوں میں 150 فیصد اضافہ ہو چکا ہے ،پہلی بار سندھ ، پنجاب،کے پی اور بلوچستان میں گندم کی قیمت مختلف ہو،کسان دشمن فیصلوں پرسندھ حکومت وفاق کا ساتھ نہیں دے سکتی۔انہوں نے کہا کہ نالائق حکومت کسانوں کو ان کا حق نہیں دے رہی، سلیکٹڈ سے کسان اپنا حق چھیننا جانتے ہیں،عمران خان کی حکومت کسانوں کو دیوار سے لگانا بند کرے،ایسا نہ ہو کہ کسان انقلاب لائیں۔اسماعیل راہو نے کہا کہ عمران خان کسانوں کو ریلیف دینے کی بجائے گندم مافیاز کو سپورٹ کررہے ہیں۔ صوبائی وزیر نے وفاقی حکومت کے بیان کو جھوٹا قرار دیتے ہوئے کہا کہ علیم خان اور فخر امام غلط بیانی کررہے ہیں کے گندم کی قیمت میں 400 روپے اضافہ تاریخی ہے، گندم کی قیمت 1400 سے 1800روپے جو صرف 28.57 فیصد اضافہ ہے، اس سال سندھ حکومت نے 600 روپے اضافہ کیا ہے، یہ 42.85 فیصد اضافہ ہے۔انہوں نے کہا کہ صدر آصف علی زرداری نے 2008-9 میں 425 فی من سے بڑھا کر 625 روپے فی من کی منظوری دی تھی, 2009-10 میں صدر آصف علی زرداری گندم کی قیمت میں 52 فی صد تک کا بڑا اضافہ کیا،نتیجے میں ملک میں گندم کی ریکارڈ پیداوار ہوئی اور ملک گندم ایکسپورٹ کرنے قابل بن گیا۔ انہوں نے کہا کہ پی پی پی حکومت کی پالیسی سے ملک گندم میں خود کفیل ہو کر برآمد کرنے لگا، اب پی ٹی آئی کے سلیکٹڈ حکمرانوں کی غلط پالیسیوں کی وجہ سے ہمارازرعی ملک گندم امپورٹ کررہا ہے،الیکٹڈ اور سلیکٹڈ میں یہی فرق ہے۔

ترکی میں افغان حکومت اور طالبان کے مابین ہونے والی مجوزہ امن کانفرنس ملتوی