اسرائیل کی جانب سے تقریباً تین ماہ بعد غزہ میں انسانی امداد لے جانے والے ٹرکوں کی پہلی کھیپ کے داخل ہونے کے اعلان کے بعد اقوام متحدہ نے سخت رد عمل دیتے ہوئے کہا ہے کہ 20 لاکھ سے زیادہ فلسطینیوں کی آبادی والے اس علاقے میں خوراک کے 9 ٹرکوں کے داخلے کی اجازت کو سمندر میں ایک قطرہ کے برابر ہے ۔ اقوام متحدہ کے سیکرٹری جنرل کے انسانی امور کے نائب سیکرٹری ٹوم فلیٹچر نے کہا کہ اسرائیل نے کرم ابو سالم کراسنگ کے ذریعے 9 امدادی ٹرکوں کو غزہ میں داخل ہونے کی اجازت دی ہے جو 11 ہفتوں سے جاری مکمل محاصرے کے بعد پہلا موقع ہے۔ انہوں نے ایک بیان میں مزید کہا کہ لیکن یہ اس مقدار کی نسبت سمندر میں ایک قطرہ ہے جس کی فوری طور پر ضرورت ہے۔ منگل سے غزہ میں مزید امداد داخل کرنے کی اجازت دی جانی چاہیے۔ انہوں نے مزید کہا کہ لوٹ مار کو کم کرنے کے لیے امداد کی ایک باقاعدہ ترسیل ہونی چاہیے اور انسانی ہمدردی کے کارکنوں کو متعدد راستوں کے استعمال کی اجازت دی جانی چاہیے۔ انسانی ردعمل کو تجارتی سامان کے ذریعے مکمل کیا جانا چاہیے۔
اقوام متحدہ کی ایجنسیوں نے محصور علاقے میں خوراک، صاف پانی، ایندھن اور ادویات کی شدید قلت سے خبردار کیا ہے۔ عالمی ادارہ صحت کے ڈائریکٹر جنرل نے پیر کے روز غزہ کی پٹی میں قحط کے خطرے سے خبردار کیا اور کہا کہ 20 لاکھ افراد بھوک سے مر رہے ہیں۔
اسی تناظر میں فرانس، جرمنی، برطانیہ، کینیڈا، جاپان اور آسٹریلیا سمیت 22 ممالک کے وزرائے خارجہ نے اسرائیل سے مطالبہ کیا تھا کہ وہ اقوام متحدہ اور غیر سرکاری تنظیموں کی نگرانی میں غزہ میں مکمل اور فوری طور پر امداد کی دوبارہ اجازت دے۔ جرمن وزارت خارجہ کی جانب سے جاری ایک مشترکہ بیان میں کہا گیا تھا کہ اقوام متحدہ اور انسانی تنظیمیں غزہ میں امداد کی فراہمی کے لیے اسرائیل کی جانب سے اپنائے گئے نئے طریقہ کار کی حمایت نہیں کر سکتیں۔
اسرائیلی فوج نے کہا کہ اقوام متحدہ کے انسانی امداد والے پانچ ٹرکوں، جن میں بچوں کے لیے خوراک بھی شامل تھی، کو کرم ابو سالم کراسنگ کے ذریعے غزہ کی پٹی میں داخل ہونے کی اجازت دی گئی ہے۔ اسرائیل نے 2 مارچ سے غزہ میں امدادی سامان کے داخلہ روک رکھا تھا۔ 19 مئی کو صرف 9 ٹرکوں کو داخل ہونے کی اجازت دی گئی ۔ اس عرصہ میں غزہ کی پٹی پر بچوں سمیت لاکھوں افراد قحط کے دہانے پر پہنچ گئے ہیں۔ اس دوران امریکہ کی جانب سے بھی اسرائیل کے محاصرے کو ختم کرنے کا دباؤ ڈالا گیا۔