چیف جسٹس پاکستان نے جسٹس شوکت عزیز صدیقی کی تقریر کا نوٹس لے لیا
ترجمان سپریم کورٹ کے مطابق چیف جسٹس میاں ثاقب نثار نے اسلام آباد ہائیکورٹ کے جج جسٹس شوکت عزیز صدیقی کی تقریر کا از خود نوٹس لے لیا،، چیف جسٹس نے پیمرا کو تقریر کا ریکارڈ فراہم کرنے کا حکم بھی دے دیا ہے ،، اس سے قبل سپریم کورٹ کراچی رجسٹری میں مختلف کیسز کی سماعت ہوئی۔ چیف جسٹس نے جسٹس شوکت عزیز صدیقی کی تقریر پر شدید برہمی کا اظہار کیا ،، انہوں نے ریمارکس دیے ،، اسلام آباد کے ایک جج کا بیان پڑھا جس پر بہت افسوس ہوا، عدلیہ کے سربراہ کے طور پر یقین دلاتا ہوں کہ ہم پر کسی کا دباؤ نہیں۔ چیف جسٹس نے کہا کہ ہم پوری طرح آزاد اور خود مختار کام کررہے ہیں، ہمارے ججوں پر کہیں کوئی دباؤ نہیں، اس طرح کے بیانات ناقابلِ فہم اور ناقابلِ قبول ہیں، جائزہ لیں گے کہ جج کے خلاف کیا قانونی کارروائی ہوسکتی ہے، ان کے خلاف قانونی کارروائی کریں گے اور حقائق قوم کے سامنے لائیں گے، میں سختی کے ساتھ واضح کررہا ہوں کہ ہم پر کوئی دباؤ نہیں۔
