وزیراعظم عمران خان نے کہاہے کہ ملک کوریاست مدینہ منورہ کی طرز پر فلاحی ریاست میں تبدیل کرناتحریک انصاف کی حکومت کانصب العین ہے۔ واشنگٹن میں کیپیٹل ون ارینامیں پاکستانی برادری کے ایک اجتماع سے خطاب کرتے ہوئے انہوں نے کہاکہ ہمدردی، انصاف، قانون کی بالادستی، خواتین ،بچوں اور بزرگوں کی نگہداشت ریاست مدینہ کے اصول تھے۔ عمران خان نے کہاکہ نیاپاکستان میں ہرایک جوابدہ ہے اور امیر اور غریب کے لئے دو الگ قوانین نہیں ہوسکتے۔ انہوں نے کہاکہ ہرایک کے لئے میرٹ اورمساوات ہمارانیاپاکستان کاویژن ہے جبکہ ہرشہری کو یکساں مواقع فراہم کئے جائیں گے۔ وزیراعظم نے اس بات کااعادہ کیاکہ لوٹ مار کرنے والوں کو این آراونہیں دیاجائے گا ۔ انہوں نے بلیک میلنگ یاکسی دبائو میں آئے بغیر احتساب کے عمل کوآگے بڑھانے کاعزم ظاہرکیا۔ انہوں نے کہاکہ حکومت کے مختلف ملکوں کے ساتھ معاہدے طے پاگئے ہیں جن کے تحت بیرون ملک سے لوٹی گئی قومی دولت واپس لائی جائے گی۔ عمران خان نے کہاکہ تحریک انصاف کی حکومت ملک میں یکساں نصاب لانے کی کوشش کررہی ہے تاکہ ہرشخص کومساوی مواقع مل سکیں، انہوں نے کہاکہ مدارس کے طلباء کو بھی قومی دھارے میں لایاجائے گا۔ پاکستانی برادری سے خطاب کرتے ہوئے وزیرخارجہ شاہ محمودقریشی نے کہاکہ پاکستان خطے میں امن واستحکام کاخواہاں ہے۔ انہوں نے کہاکہ پاکستان نے دہشت گردی کا کامیابی سے خاتمہ کیاہے۔ وزیرخارجہ نے کہاکہ دہشت گردی سے متاثرہ قبائلی اضلاع میں پُرامن انتخابات کاانعقاد ترقی اور خوشحالی کاآغاز ہے۔ انہوں نے کہاکہ پاکستان علاقائی استحکام کے لئے افغان امن عمل کی حمایت جاری رکھے گا۔ انہوں نے کہاکہ خطے میں امن واستحکام کے خواب کے ساتھ آج ہم امریکہ میں موجود ہیں۔ شاہ محمودقریشی نے کہاکہ وزیراعظم عمران خان صدرڈونلڈٹرمپ کے ساتھ نیاپاکستان کے لائحہ عمل کے حوالے سے تبادلہ خیال کریں گے۔ انہوں نے کہاکہ پاکستان چین پاکستان راہداری سے فائدہ اٹھانے کے لئے دنیاکاخیرمقدم کرتا ہے اور یہ سرکاری اور کاروبارکے لئے کھلی ہے۔

کراچی سے لاہور جانیوالی فلائٹ میں غلاف کعبہ کی زیارت