اسلام آباد ہائیکورٹ نے سنتھیا ڈی رچی کے خلاف مقدمہ درج کرنے کے عدالتی فیصلے کے خلاف درخواست پر فیصلہ محفوظ کر لیا ۔امریکی شہری سنتھیا رچی نے اسلام آباد کے ایڈیشنل سیشن جج کی جانب سے مقدمہ درج کرنے کے حکم کو اسلام آباد ہائیکورٹ میں چیلنج کیا تھا۔سنتھیا رچی نے اپنی درخواست میں موقف اپنایا کہ میں نے کوئی جرم نہیں کیا، ایف آئی اے کو میرے خلاف مقدمہ درج کرنے سے روکا جائے۔چیف جسٹس اسلام آباد ہائی کورٹ جسٹس اطہر من اللہ نے امریکی شہری سنتھیا ڈی رچی کے خلاف مقدمہ درج کرنے کے عدالتی فیصلے کے خلاف درخواست پر سماعت کی۔ سنتھیا ڈی رچی کی جانب سے وکیل عمران فیروز ملک عدالت میں پیش ہوئے۔دوران سماعت وکیل عمران فیروز ملک نے مقدمہ اندراج سے متعلق سیشن جج کا فیصلہ پڑھ کر سنایا جس پر چیف جسٹس نے استفسار کیا کہ آپ اس فیصلے سے کیسے متاثر ہیں؟درخواست گزار کے وکیل نے جواب دیا کہ اس فیصلے کے کچھ دیگر پہلو بھی ہیں۔چیف جسٹس اطہر من اللہ نے ریمارکس دئیے کہ یہ براہ راست مقدمہ درج کرنے کا حکم نہیں ہے، اس سلسلے میں وفاقی تحقیقاتی ادارے(ایف آئی اے)کوپہلے انکوائری کرنے کا حکم دیا گیا ہے۔ایڈووکیٹ عمران فیروز نے کہا کہ ہمیں انکوائری پر نہیں، صرف مقدمہ اندراج پر اعتراض ہے۔اس حوالے سے چیف جسٹس کا کہنا تھا کہ  عدالت اس کیس کے میرٹس میں نہیں جائے گی۔ دلائل سننے کے بعد اسلام آباد ہائیکورٹ کے چیف جسٹس اطہر من اللہ نے فیصلہ محفوظ کر لیا۔

قوم کیلئے کرونا ویکسین سے متعلق بڑی خوشخبری