میری جان کو کوئی خطرہ نہیں ہے, فوج نے کہا تھا ہم نیوٹرل ہیں تو نیوٹرل رہیں: عمران خان
پشاور: چیئرمین پاکستان تحریک انصاف عمران خان نے کہا ہے کہ لانگ مارچ کب کرنا ہے؟ فیصلہ کر لیا ہے۔ انہوں نے 25 مئی کو اسلام آباد کی طرف لانگ مارچ کرنے کا اعلان کردیا ہے۔ انہوں ںے کہا کہ فوج نے کہا تھا کہ ہم نیوٹرل ہیں توپھرنیوٹرل رہیں، یہ سیاست نہیں ،انقلاب آرہا ہے، پولیس، بیوروکریسی اورفوج سے کہتا ہوں کہ ہم توڑ پھوڑ نہیں کریں گے، پیٹرول، ڈیزل اور ٹرانسپورٹ بند ہوگی، ابھی سے تیاری کرلیں۔ انہوں نے یہ اعلان پی ٹی آئی کور کمیٹی اجلاس کے بعد منعقدہ ایک پریس کانفرنس سے خطاب کرتے ہوئے کیا۔ اس موقع پر وزیراعلیٰ خیبرپختونخوا محمود خان اور سابق وزیر خارجہ مخدوم شاہ محمود قریشی بھی موجود ہیں۔عمران خان نے کہا کہ ہم نے پوری کوشش کی ہمارے خلاف سازش کامیاب نہ ہو لیکن ہم کامیاب نہیں ہو سکے، یہ سازش میرے خلاف نہیں پاکستان کے خلاف کی گئی، رجیم چینج کی سازش کی گئی، مجھے اگست میں اس سازش سے متعلق پتا چل گیا تھا، اس میں وہ لوگ شامل ہوئے جو اپنی کرپشن چھپانا چاہتے تھے، 2018 میں ہمیں ملک دیوالیہ ملا، ملک ہر اعتبار سے آگے بڑھ رہا تھا۔انہوں نے کہا کہ کورونا کے دوران ہماری حکومت نے بہترین طریقے سے صورتحال کو سنبھالا، ہمیں دھمکیاں دے کر ہماری توہین کی گئی کہ 22 کروڑ عوام کے منتخب وزیراعظم کو ہٹایا گیا، ہمیں دھمکی کی گئی کہ اگر عمران خان کو نہیں ہٹایا گیا تو مشکلات کا سامنا کرنا پڑے گا۔چیئرمین پی ٹی آئی نے کہا کہ ان کا تجربہ صرف کرپشن، کیسز ختم کرنےاور انتقام کا ہے، ان کے پاس نہ منصوبہ ہے اور نہ فیصلہ کرنے کی ہمت ہے، نیشنل سیکیورٹی کونسل کو کہہ رہے ہیں کہ پٹرول ڈیزل کی قیمتیں بڑھانے کا فیصلہ کریں، فوج پر سارا بوجھ پڑے، خود پر بوجھ لینا نہیں چاہتے ہیں۔
