بھارت کو پاکستان سے مل کر مسئلہ کشمیر کا حل تلاش کرنا ہو گا۔ فرانسیسی صدر

 فرانس کے صدرایمونئیل میکرون نے بھارتی وزیراعظم نریندرمودی پرزوردیا کہ پاکستان کےساتھ مل کرمسئلہ کشمیرکاحل تلاش کریں، آئندہ چند روز میں وزیر اعظم عمران خان سے بھی بات کروں گا۔تفصیلات کے مطابق مقبوضہ کشمیر کی حیثیت یکطرفہ بدلنے کا اقدام بھارتی وزیر اعظم نریندر مودی کے گلے پڑگیا، مودی فرانس پہنچے توصدر میکرون نے بھی کشمیر کی صورتحال پر بات شروع کردی۔میڈیارپورٹس کے مطابق بھارتی وزیر اعظم فرانس کے دورے پر ہیں، جہاں فرانسیسی صدر ایمانیوئل میکرون سے ملاقات ہوئی، انہوں نے مودی سے مسئلہ کشمیر پر بات کی اور بعد میں صحافیوں سے گفتگو میں کہا انہوں نے بھارتی وزیر اعظم پر زور دیا ہے کہ وہ پاکستان سے مذاکرات کریں اور پاکستان سے مل کرمسئلہ کشمیر کا حل تلاش کریں۔ایمانیوئل میکرون کا کہنا تھا کہ وہ آئندہ چند روز میں وزیر اعظم عمران خان سے بھی بات کریں گا کہ کشمیر کے معاملے پر دو طرفہ بنیادوں پر بات ہونی چاہیے۔فرانسیسی صدر نے کہا فرانس کشمیر میں عام شہریوں کے حقوق پر توجہ مرکوز رکھے گا، ایل او سی کے اطراف آبادی کے مفادات اور حقوق یقینی بنانا ہوں گے، حالات خراب کرنے سے اجتناب کیا جائے۔ان کا مزید کہنا تھا کہ خطے کے استحکام،دہشت گردی کیخلاف جنگ کی پالیسی کی حمایت کرتے ہیں۔یاد رہے شاہ محمود قریشی نے مقبوضہ کشمیر کی صورت حال کے حوالے سے اپنے فرانسیسی ہم منصب ژاں ایو لیدریاں سے فون پر رابطہ کرکے مقبوضہ کشمیر میں بھارتی یک طرفہ اقدامات سے خطے میں امن کو درپیش خطرات سے آگاہ کیا تھا ۔دریں اثنا، فرانسیسی وزیر خارجہ ژاں ایو لیدریاں نے مودی کے متوقع دورہ پیرس کے دوران بات چیت کا عندیہ دیا تھا اور دونوں وزرائے خارجہ نے باہمی مشاورت جاری رکھنے کا فیصلہ کیا تھا۔