بھارتی سینئر سفارتکار کو دفترخارجہ طلب کرکے بھارتی فورسز کی جانب سے سیز فائر معاہدے کی خلاف ورزی پر شدید احتجاج کیا گیا اور احتجاجی مراسلہ تھما دیا ۔دفترخارجہ کی جانب سے جاری ہونے والے بیان کے مطابق ایل او سی پر بھارتی فورسز کی اشتعال انگیزی پر سینئر بھارتی سفارتکار کو دفترخارجہ طلب کرکے شدید احتجاج کیا گیا۔پاکستان کی جانب سے سینئر بھارتی سفارتکار کو احتجاجی مراسلہ تھمایا گیا جس میں بتایا گیا کہ کنٹرول لائن اور ورکنگ بائونڈری پر بھارتی افواج کی جانب سے بھاری ہتھیاروں سے شہری آبادی کو جان بوجھ کر نشانہ بنایا جارہا ہے، بھارت رواں سال اب تک جنگ بندی کی 3012 خلاف ورزیاں کرچکا ہے، رواں سال بھارتی فورسز کی فائرنگ سے 28 افراد شہید اور 253 افراد زخمی ہوچکے ہیں۔مراسلے میں بتایا گیا کہ گذشتہ روز بھی بھارتی فورسز کی جانب سے تتہ پانی اور جندروٹ سیکٹرز میں بلااشتعال فائرنگ کی، جس کے نتیجے میں 50سالہ خاتون شہید ہوگئی تھیں، جبکہ بھارتی فائرنگ سے ایک معصوم بچے اور خاتون سمیت 4 افراد شدید زخمی ہوئے تھے۔پاکستان نے کہا ہے کہ اس طرح کی بے وقوفانہ حرکتیں 2003 کے سیز فائرمعاہدے سمیت انسانی عظمت ووقار، بین الاقوامی انسانی حقوق و قوانین اور پیشہ وارنہ فوجی طرزعمل کے برعکس اور اس کی صریحا خلاف ورزی ہے، ایسے اقدامات سے بھارت مقبوضہ جموں و کشمیر میں انسانی حقوق کی سنگین صورتحال سے توجہ ہٹا نہیں سکتا۔پاکستان نے تنبیہہ کی کہ بھارت 2003 کے جنگ بندی سمجھوتے کا احترام کرے، جنگ بندی معاہدے کی خلاف ورزی کی تحقیقات کرائے اور کنٹرول لائن پر امن برقرار رکھے، جب کہ اقوام متحدہ کے فوجی مبصر گروپ برائے پاکستان اور بھارت کو اقوام متحدہ کی سلامتی کونسل کی قراردادوں کے مطابق تفویض کردہ اپنا کردار ادا کرنے کی اجازت دے۔

نامعلوم افراد کی فائرنگ سے ایک شخص جاں بحق