امریکی تحقیقی  ادارے نے کہا ہے کہ ڈیلٹا ویریئنٹ کے مقابلے میں اومیکرون سے ہلاکت کا امکان 91 فیصد کم ہوتا ہے۔ رپورٹ کے مطابق  امریکی ریاست کیلیفورنیا میں کی جانے والی ایک نئی تحقیق میں یہ بات سامنے آئی ہے کہ ’سارس کوو 2‘ وائرس کے ڈیلٹا ویریئنٹ کا شکار ہونے والوں کی نسبت اومیکرون ویریئنٹ سے متاثر ہونے والوں میں موت کا امکان 91 فیصد کم ہوتا ہے۔ یہ تحقیق امریکی ریاست کیلیفورنیا کے  ایسے 70 ہزار افراد پر کی گئی جو ڈیلٹا یا اومیکرون ویریئنٹ میں سے کسی ایک کا شکار ہوئے تھے، ان تمام افراد پر کی گئی تحقیق سے یہ معلوم ہوا کہ  اومیکرون ویریئنٹ کے متاثرین میں موت کا امکان، ڈیلٹا سے متاثر افراد کی نسبت 91 فیصد کم رہا۔  
صرف یہی نہیں بلکہ ڈیلٹا ویریئنٹ میں مبتلا ہونے والوں کے مقابلے میں اومیکرون کے متاثرین کی حالت شدید خراب ہونے اور آئی سی یو میں داخل کرانے کی شرح 74 فیصد کم رہی۔ جبکہ اومیکرون کا شکار افراد کو ڈیلٹا ویریئنٹ میں مبتلا ہونے والوں کی بنسبت اسپتال میں کم وقت گزارنا پڑا۔ تاہم ماہرین نے یہ واضح کیا ہے کہ اس تحقیق کو بنیاد بنا کر کورونا ویکسین لگوانے سے منع نہ کیا جائے کیونکہ اومیکرون ویریئنٹ اپنی بہت کم ہلاکت خیزی کے باوجود، ڈیلٹا ویریئنٹ کے مقابلے میں بہت تیزی سے پھیلتا ہے اور کئی گنا زیادہ افراد کو متاثر کرتا ہے۔ یعنی اس سے موت کا خطرہ کم ضرور ہے لیکن اس کا شکار ہونے میں دیر نہیں لگتی کیونکہ یہ ایک تیزی سے پھیلنے اور بڑھنے والا وائرس ہے۔ یاد رہے کہ یہ تحقیق ’میڈیکل آرکائیو‘ کے پری پرنٹ سرور پر شائع ہوئی ہے  جس کو حتمی قرار نہیں دیا جا سکتا۔

چودھری شجاعت نے چودھری سرور کو سیاسی فیصلہ کرنے سے روک دیا