پنجاب کے ضلع بہاولپور میں جائیداد کے تنازع پر لالچی شخص نے اپنی والدہ بہنوں اور دیگر کو مار مار کر لہولہان کردیا، پولیس نے کارروائی کا آغاز کردیا ہے،تفصیلات کے مطابق جائیداد کے لالچ نے انسان کو اتنا اندھا کردیا کہ رشتوں کا احترام بھی باقی نہ رہا، رفیق نامی شخص نے اپنی والدہ، بہنوں اور بھانجیوں پر سفاکانہ تشدد کرکے انہیں شدید زخمی کردیا۔ پولیس ذرائع کے مطابق بہاولپور کے نواحی علاقے نوشہرہ جدید فاروق آباد پل کا رہائشی رفیق وراثتی دکانیں فریقین کی رضامندی کے بغیر فروخت کرنا چاہتا تھا۔ جس پراس کی والدہ والدہ اور بہن نے اسے ایسا کرنے سے روکا تو رفیق آپے سے باہر ہوگیا، ملزم نے اپنے بیٹوں کے ساتھ بھی ظلم کی انتہا کردی، پہلے تو اپنی والدہ اور بہن کو دھکے دئیے اور تشدد کرکے انہیں زخمی کردیا۔اسے روکنے کیلئے جب اس کی بھانجیاں سامنے آئیں تو ملزم رفیق نے انہیں بھی تشدد کا نشانہ بنایا، صورتحال دیکھ کر علاقہ مکینوں نے بھی اسے روکنے کی کوشش کی لیکن لوگوں کے روکنے کے باوجود اس نے تشدد جاری رکھا۔بعد ازاں علاقہ ڈی پی او نے واقعے کا مقدمہ درج کرکے ملزمان کو گرفتار کرنے کی ہدایت جاری کردی ہے، اس حوالے سے مزید تفتیش جاری ہے۔