یوم پاکستان پریڈ:امن کے داعی پاکستان نے دشمن پر دھاک بٹھادی
ملک بھر میں یوم پاکستان ملی جوش وجذبے کے ساتھ منایا جا رہا ہے، اور اس سلسلے میں اسلام آباد کے شکر پڑیاں پریڈ گراؤنڈ میں مسلح افواج کی جانب سے شاندار پریڈ کا انعقاد کیا گیا،صدر مملکت ڈاکٹر عارف علوی، وزیراعظم عمران خان، چیئرمین جوائنٹ چیفس سمیت تینوں مسلح افواج کے سربراہ تقریب میں شریک ہوئے جبکہ تقریب کے مہمان خصوصی ملیشیا کے وزیراعظم مہاتیرمحمد تھے۔ تقریب میں غیرملکی مہمان بحرین کی نیشنل گارڈ کے سربراہ اور آذربائیجان کے وزیردفاع بھی شریک تھے، اس کے علاوہ حکومتی شخصیات، غیرملکی سفارت کار اور اعلیٰ سول وعسکری حکام سمیت زندگی کے مختلف شعبہ جات سے تعلق رکھنے والی شخصیات نے تقریب میں شرکت کی۔ اس موقع پر روایتی بگل بجا کر صدرمملکت کی پریڈ گراؤنڈ میں آمد کا اعلان کیا گیا جو خصوصی لال بگھی میں سوار ہو کر پریڈ گراؤنڈ پہنچے،صدر پاکستان سمیت مہمان خصوصی کی آمد کے بعد گراؤنڈ میں قومی ترانا پڑھا گیا اور کلام پاک کی تلاوت کی گئی۔ بعدازاں ڈاکٹرعارف علوی کو مسلح افواج کے دستوں نے سلامی پیش کی اور صدرنے مسلح افواج کی پریڈ کا معائنہ کیا،صدر پاکستان کو سلامی پیش کیے جانے کے بعد پاک فضائیہ کے سربراہ ایئرچیف مارشل مجاہد انور خان کی سربراہی میں جنگی طیاروں نے صدر مملکت کو سلامی پیش کی۔ ایئرمارشل مجاہد انور کی سربراہی میں پاک فضائیہ کے طیاروں نے فلائی پاسٹ کیا اور اس دوران طیاروں کی گھن گھرج نے وفاقی دارالحکومت کا ماحول گرما دیا،صدرمملکت ڈاکٹرعارف علوی نے شاندار پریڈ کے انعقاد پر مسلح افواج اور منتظمین کو مبارکباد دی۔ پاک فضائیہ اور پاک بحریہ نے فلائنگ پاسٹ کا شاندار مظاہرہ کیا اور پاک فوج کے دستوں نے مارچ پاسٹ کیا۔ پریڈ میں چین، سعودی عرب، ترکی، آذربائیجان، بحرین اور سری لنکا کے فوجی دستوں نے بھی حصہ لیا اور پاکستان کے چاروں صوبوں، آزاد کشمیراور گلگت بلتستان کی ثقافت کی نمائندگی کرنے والے فلوٹس میں فن کا مظاہرہ بھی کیا گیا۔ پاک فوج، رینجرز، بحریہ کے دستوں نے معزز مہمانوں کو سلامی دی اور الخالد ٹینکوں کے دستے نے بھی مخصوص انداز میں سلامی پیش کی،پریڈ میں دفاعی سازوسامان کی نمائش کی گئی جس میں دشمن کو دندان شکن جواب دینے کی صلاحیت رکھنے والے الخالد سمیت دیگر ٹینکوں اورمیزائلوں کی بھی نمائش کی گئی۔ پوم پاکستان پر ہونے والی پریڈ میں چین کے جے 10 اور ترکی کے ایف 16 لڑاکا طیارے شامل تھے، سعودی عرب، آزربائیجان کے فوجی دستے بھی شریک تھے،اسلام آباد میں پریڈ گراؤنڈ کے اطراف کی سڑکوں کو بھی بند رکھا گیا، علاقے میں موبائل فون سروس معطل رہی جبکہ ٹریفک کی روانی برقرار رکھنے کے لیے متبادل پلان جاری کیا گیا تھا۔ اس سے قبل آج علی الصبح اسلام آباد میں دن کا آغاز اکتیس اور صوبائی دارالحکومتوں میں اکیس، اکیس توپوں کی سلامی سے ہوا،توپوں کی سلامی کے موقع پر پاک فوج کے جوانوں کی جانب سے ’نعرہ تکبیر‘ اور ’پاکستان زندہ باد‘ کے فلک شگاف نعرے لگائے گئے