’’فوج کی سیاست میں مداخلت غیرآئینی ہے‘‘: آرمی چیف جنرل قمر جاوید باجوہ
پاک فوج کے سربراہ جنرل قمر جاوید باجوہ نے کہا ہے کہ 29 نومبر کو میں ریٹائر ہو جاؤں گا، یوم شہدا پر بطور آرمی چیف آج آخری خطاب کر رہا ہوں۔یوم دفاع اور یوم شہدا کی تقریب سےخطاب کرتے ہوئے انہوں نے کہا کہ شہدا کے لواحقین کو کبھی تنہا نہیں چھوڑیں گے،مجھےفخر ہےکہ 6سال عظیم فوج کاسربراہ رہا،ہمارے جوان ہر وقت اپنے وطن کے دفاع کیلئےتیار رہتےہیں۔انہوں نے کہا کہ پاک فوج نے اپنے مینڈیٹ سےبڑھ کر قوم کی خدمت کی ہے،فوج کی سیاست میں مداخلت غیرآئینی ہے، ہم نےعزم کیاکہ فوج سیاست سےدوررہےگی۔جنرل قمر جاوید باجوہ نے کہا کہ کئی حلقوں کی جانب سےفوج پرشدید تنقید کے ساتھ غیر شائستہ زبان کا استعمال کیا گیا، کیا یہ ممکن ہے کہ بیرونی سازش ہو اور فوج خاموشی سے بیٹھی رہے، یہ گناہ کبیرہ ہے۔ان کا کہنا تھا کہ ایک جعلی اورجھوٹا بیانیہ بنا کر ملک میں ہیجان کی کیفیت پیدا کی گئی،سب کو ذہن نشین کرلینا چاہیے کہ صبر کی بھی ایک حد ہے، امید ہے سیاسی جماعتیں اپنے رویئے پر نظرثانی کریں گی۔انہوں نے کہا کہ وثوق سے کہہ سکتا ہے ہوں کہ پاکستان سنگین معاشی مشکلات کا شکار ہے، کوئی بھی ایک سیاسی جماعت ملک کو اس مشکل سے نہیں نکال سکتی،سیاست میں سلیکٹڈاور امپورٹڈ کے القابات کو ختم کرنا ہوگا۔ان کا کہنا تھا کہ ہار اور جیت سیاست کا حصہ ہوتی ہے،کسی نے سلیکٹڈ کا لقب دیا تو کسی نے امپورٹڈ کا، یہ غلط ہے،پاکستان کی سلامتی کیلئے شہداء نے بےپناہ قربانیاں دی ہیں، مادروطن کی سالمیت کی حفاظت ہمارااولین فرض ہےاوررہےگا۔
