خاشقجی کیس کے حوالے سے سعودی عرب کے ساتھ مذاکرات جاری ہیں۔ جان بولٹن
امریکا کے قومی سلامتی کے مشیر جان بولٹن نے کہا ہے کہ استنبول کے سعودی قونصل خانے میں قتل ہونے والے صحافی جمال خاشقجی کے معاملے پر سعودی حکام کے ساتھ بات چیت جاری ہے۔ ان کا کہنا تھا کہ امریکا جمال خاشقجی کے حوالے سے مکمل تفصیلات جاننا چاہتا ہے اور اس حوالے سے سعودی عرب کےساتھ مکمل رابطے قائم ہیں۔روس کے "ایکو ماسکووی" ریوڈیو کی رپورٹ کے مطابق وائٹ ہاﺅس کے مشیر اور صدر ٹرمپ کے داماد جارڈ کوشنر بھی اس حوالے سے ایک بیان میں کہا ہے کہ سعودی عرب امریکا کا اہم ترین اتحادی ہے۔انہوںنے کہا کہ امریکا خاشقجی کیس کے حوالے سے تفصیلات اکٹھی کررہا ہے۔ خاشقجی کیس کے حوالے سے صدر ڈونلڈ ٹرمپ اور وزیر خارجہ مائیک پومپیو ہی اقدامات اٹھائیں گے۔ادھرترکی کے صدر طیب ایردوآن نے کہا ہے کہ وہ آج منگل کو جمال خاشقجی کے قتل کے حوالے سے تفصیلات بیان کریںگے۔ ان کا کہنا تھا کہ وہ حکمراں جماعت "آق" کےاجلاس کے دوران خاشقجی کیس کی تفصیلات بیان کریں گے۔