اسلام آباد: چیف جسٹس آف پاکستان آصف سعید کھوسہ نے طویل عرصے سے زیر التوا مقدمات کو جلد نمٹانے کا حکم دے دیا۔ چیف جسٹس کا کہنا ہے کہ جھوٹی مقدمے بازی اور سماعت غیر ضروری طور پر ملتوی کرنے کی حوصلہ شکنی ہونی چاہیے۔ سندھ ہائی کورٹ میں اہم اجلاس کی صدارت کرتے ہوئے چیف جسٹس نے کہا کہ سماعت کا غیر ضروری التوا مقدمات کے فیصلے میں تاخیر کی بڑی وجہ ہے۔ انھوں نے سول، کرمنل اور ریونیو سے متعلق مقدمات فوری حل کرنے کا نظام بھی واضع کرنے کی ہدایت کی۔ اجلاس میں چیف جسٹس سندھ ہائی کورٹ احمد علی شیخ نے چیف جسٹس آف پاکستان کو خصوصی بنچز کے حوالے سے تفصیلات سے آگاہ کیا۔