ملک میں پٹرولیم مصنوعات کی قلت کی خبروں پر پی ایس او کا موقف
ملک میں پٹرولیم مصنوعات کی قلت کی خبروں پر پی ایس او کا موقف آگیا۔ ایک بیان میں ترجمان پاکستان اسٹیٹ آئل (پی ایس او) نے کہا ہے کہ پی ایس او کے پاس ضرورت کے تحت پیٹرولیم مصنوعات کا ذخیرہ موجود ہے اور اس وقت ملک بھر میں فرنس آئل، پیٹرول اور مائع قدرتی گیس کی بلا تعطل فراہمی جاری ہے، پی ایس او ملک بھر میں پیٹرول اور ہائی اسپیڈ ڈیزل کی مسلسل فراہمی کو یقینی بنا رہا ہے، ادارے کے پاس آئل اینڈ گیس ریگولیٹری اتھارٹی (اوگرا) کے مقرر کردہ ایام کے مطابق پیٹرولیم مصنوعات کا ذخیرہ موجود ہے۔ ترجمان نے بتایا ہے کہ پی ایس او کی سپلائی چین پر اچانک دباؤ بڑھنےکے باوجود ہماری ٹیمیں 24 گھنٹےکام کر رہی ہیں، پی ایس او کے پاس تقریباً 2 لاکھ ٹن فرنس آئل اسٹاک میں موجود ہے، ایل سیز جاری کردی گئی ہیں اور 2 اضافی کارگوز بھی درآمدکیے جا رہے ہیں، ایل این جی کے 9 کارگوز پلان اور وقت کے مطابق وصول کیے جارہے ہیں، 23 جنوری 2023 تک 6 کارگوز موصول ہوچکے ہیں اوربقیہ کارگوز بھی رواں ماہ میں پہنچ جائیں گے۔
