وزیراعلیٰ پنجاب اور کابینہ کا چیف منسٹر فنڈبرائے کورونا کنٹرول کیلئے ایک ایک ماہ کی تنخواہ دینے کا اعلان
وزیراعلیٰ پنجاب سردار عثمان بزدارنے کہا ہے کہ پنجاب میں اس وقت کورونا وائرس سے متاثرہ مریضو ں کی تعداد 265 ہے جن میں 176مریض ڈیرہ غازی خان کے قرنطینہ سنٹر میں موجود ہیں جبکہ 59مریض لاہور، 12گجرات، 7گوجرانوالہ ،3جہلم،2راولپنڈی،2ملتان،1فیصل آباداور 1مریض منڈی بہاؤالدین میں ہےـوہ پنجاب کابینہ کے 28ویں اجلاس میں کئے گئے فیصلوں کے بارے میں ویڈیولنک کے ذریعے میڈیا کو بریفنگ دے رہے تھےـ وزیراعلیٰ پنجاب سردار عثمان بزدار نے بریفنگ کے دوران بتایاکہ پنجاب کا بینہ کے اجلاس میں کورونا وائرس کا علاج کرتے ہوئے اپنی جان کا نذرانہ پیش کرنیوالے گلگت بلتستان کے شہید ڈاکٹر اسامہ ریاض کو خراج عقیدت پیش کیا گیاہے اورشہید ڈاکٹر اسامہ ریاض کی خدمات کوسراہا گیا ہےـمیں ڈاکٹر اسامہ ریاض کو سلام پیش کرتا ہوں اورہم پنجاب میں کورونا وائرس کے مریضوں کے علاج معالجے میں مصروف عمل ڈاکٹروں ، نرسوں اور پیرا میڈیکل سٹاف کی خدمات کو بھی تحسین کی نظر سے دیکھتے ہیںـ انہوں نے بتایا کہ پنجاب کابینہ کے 28ویںاجلاس کو کورونا وائرس کی وجہ سے پیدا ہونے والی صورتحال اورحفاظتی اقدامات کے بارے میںتفصیلی بریفنگ دی گئی۔وزیراعلیٰ عثمان بزدار نے کہاکہ چیف منسٹر فنڈ برائے کورونا کنٹرول کے لئے میں اورمیری کابینہ نے ایک ماہ کی تنخواہ عطیہ کرنے کا اعلان کیاہےـپنجاب حکومت نے محکمہ صحت کو 11ارب روپے کے فنڈز جاری کر دئیے ہیں جس کی منظوری آج کابینہ کے اجلاس میں دی گئی ـ2ارب روپے کے فنڈز پی ڈی ایم اے کو جاری کئے گئے ہیں جبکہ 60کروڑ روپے اضلاع کو فراہم کر دئیے گئے ہیں اور پنجاب کابینہ نے بلوچستان حکومت کو ایک ارب روپے کے فنڈز جاری کرنے کے فیصلے کی توثیق کی ہےـ کابینہ اجلاس میںیہ فیصلہ بھی کیاگیا ہے کہ مستحقین میں موجودہ حالات کے پیش نظرزکوة کی تقسیم کا عمل ایک ماہ قبل شروع کیاجائے گا او راس ضمن میں ہم اپنی سفارشات وفاقی حکومت کو ارسال کررہے ہیں جبکہ بیت المال کے فنڈزکو بھی ریلیز کیا جارہاہے او ریہ فنڈز بھی مستحقین میں جلد تقسیم کئے جائیں گےـوزیراعلیٰ عثمان بزدار نے بتایا کہ سکولوںمیں قبل ازوقت گرمیوں کی تعطیلات کرنے اورتعطیلات کے دوران نجی سکولوں کی فیسوں میں کمی کا جائزہ لینے کے لئے کمیٹی تشکیل دے دی گئی ہے او ریہ کمیٹی آئندہ 7روز میں اپنی سفارشات پیش کرے گی جس کی روشنی میں مزید اقدامات کئے جائیں گےـ وزیراعلیٰ عثمان بزدار نے بتایا کہ اپوزیشن جماعتوں سے رابطے کیلئے وزیرقانون راجہ بشارت کی سربراہی میں ایک کمیٹی بھی تشکیل دی گئی ہے جواپوزیشن جماعتوں کی پارلیمانی پارٹیوں سے رابطہ کر کے اس مشکل گھڑی میں ملکر کام کرنے کی راہ ہموار کرے گی۔انہوںنے کہاکہ پنجاب کابینہ نے (The Punjab Infectious Diseases Prevention & Control Ordinance,2020)کے مسودے کی اصولی منظوری دے دی ہےـلاہورمیں 3 ٹیسٹنگ لیبارٹریزکو لیول تھری اپ گریڈکرنے کا فیصلہ کیاگیا ہے جبکہ راولپنڈی ،گوجرانوالہ ،ڈی جی خان ،فیصل آباداوربہاولپور میں 5نئی لیول تھری لیبز قائم کرنے کی منظوری دی گئی ہے ،جس کیلئے 62کروڑ روپے کی منظوری دی گئی ہےـوزیراعلیٰ عثمان بزدار نے بتایا کہ کابینہ نے10 ہزار ڈاکٹرز،پیرا میڈیکل سٹاف اورہیلتھ پروفیشنلز کی خدمات حاصل کرنے کی اجازت دے دی ہے، اس ضمن میں پنجاب حکومت ریٹائرڈ ڈاکٹرز کی خدمات بھی حا صل کرے گی جبکہ کورونا وائرس سے جاں بحق ہونے والے مریضوں کے لواحقین کے لئے 8لاکھ روپے مالی امداد کی منظوری بھی دی گئی ہے۔ پنجاب حکومت عام آدمی اور غریب طبقے کی مالی مشکلات کم کرنے کے لئے معاشی پیکیج پر کام کررہی ہے اور اس ضمن میں وزیر خزانہ اگلے چند روز میں حتمی بریفنگ دیں گے جبکہ پنجاب حکومت نے معاشی پیکیج کے حوالے سے اپنی سفارشات وفاقی حکومت کو پیش کر دی ہیں اور وفاقی حکومت کے معاشی پیکیج کا اعلان وزیراعظم عمران خان کریں گے ـوزیراعلیٰ عثمان بزدار نے بتایاکہ پنجاب کابینہ نے آج بلدیاتی ایکٹ میں ترمیم کی منظوری دی ہے اور موجودہ حالات کے پیش نظر بلدیاتی الیکشن کو 9ماہ کے لئے موخر کرنے پر اتفاق کیا گیا ہے او راس سلسلے میں آرڈیننس کا اجراء کیاجا رہاہے کیونکہ بلدیاتی الیکشن کرانے کی حتمی تاریخ 5مئی ہےـکابینہ اجلاس میں چیف سیکرٹری نے کورونا وائرس کے حوالے سے ہنگامی( Contingency )پلان پیش کیا جسے منظور کیا گیاـوزیراعلیٰ نے بتایاکہ پنجاب کے 36اضلاع میں صوبائی وزراء کو ذمہ داریاں دی گئی ہیں تاکہ وہ مقامی سطح پر انتظامیہ کے ساتھ ملکر کورونا وائرس سے نمٹنے کے لئے اقدامات کریںـکابینہ اجلاس میں محکمہ صحت کو ہدایت کی گئی ہے کہ ضروری حفاظتی سامان اور لباس کی خریداری جلد مکمل کی جائےـایک سوال کے جواب میں وزیراعلیٰ نے کہاکہ پنجاب میں دفعہ 144نافذ ہے اور کورونا وائرس کے بچائو کے لئے کئے جانے والے ا قدامات کی پابندی ہر صورت کرائی جائے گی تاہم کھانے پینے کی اشیاء کی ہوم ڈلیوری اورادویات ، سینی ٹائزر وغیرہ کی تیاری میں استعمال ہونے والے خام مال کا کاروبار متاثر نہیں ہوگا اورکسی بھی ایشو کی صورت میں مقامی لوگ متعلقہ انتظامیہ سے رابطہ کر سکتے ہیںـایک اور سوال میں وزیراعلیٰ نے کہاکہ مساجد کے لئے ایس او پیز کااجراء کر دیا گیاہے اور مساجد میں بھی پیشگی اقدامات لئے جا رہے ہیںـانہوںنے کہاکہ اس وقت ایمرجنسی کی صورتحال ہے او رہم پوری طرح لڑنے کے لئے تیار ہیںـمحکمہ صحت نے اپنی تمام تیاریاں کررکھی ہیں اور فنڈز بھی فراہم کردئیے گئے ہیںـانشاء اللہ اس موذی مرض سے لڑیں گے اور اسے شکست دیں گے ـایک سوال کے جواب میں انہوںنے کہاکہ یہ کرفیو ہے نہ لاک ڈائون بلکہ حکومت نے عوام کی زندگیوں کی حفاظت کیلئے اقدامات اٹھائے ہیںـپنجاب حکومت نے آرٹیکل 245کے تحت فوج کی خدمات بھی حاصل کی ہیںـصوبائی وزراء یاسمین راشد، راجہ بشارت، فیاض الحسن چوہان ،ہاشم جواں بخت اورسیکرٹری اطلاعات بھی اس موقع پر موجود تھےـ قبل ازیں وزیراعلیٰ پنجاب سردار عثمان بزدار کی زیر صدارت 90شاہراہ قائد اعظم پر پنجاب کا بینہ کا 28واں اجلاس منعقد ہوا ـاجلاس میں کورونا وائرس کے مریضوں کے علاج میں مصروف گلگت بلتستان کے ڈاکٹر اسامہ ریاض شہید کو زبردست الفاظ میں خراج عقیدت پیش کیاگیاـاجلاس میں (The Punjab Infectious Diseases Prevention & Control Ordinance,2020)کے مسودے کی اصولی منظوری دی گئیـاجلاس میں لاہورمیں 3 ٹیسٹنگ لیبارٹریزکو لیول تھری اپ گریڈکرنے کا فیصلہ کیاگیا ہے جبکہ راولپنڈی،گوجرانوالہ ،ڈی جی خان ،فیصل آباداوربہاولپور میں 5نئی لیول تھری لیبز قائم کرنے کی منظوری دی گئی ہے جس کیلئے 62کروڑ روپے کی منظوری دی گئی ہےـ وزیراعلیٰ عثمان بزدار نے ہدایت کی کہ ہر ڈویژن میں ٹیسٹنگ لیب قائم کرنے کا جائزہ لیا جائے اور اس سلسلے میں فوری اقدامات کئے جائیںـکابینہ نے10 ہزار ڈاکٹرز،پیرا میڈیکل سٹاف اورہیلتھ پروفیشنلز کی خدمات حاصل کرنے کی اجازت دے دی ہےـکابینہ نے کورونا وائرس سے جاں بحق ہونے والے مریضوں کے لواحقین کے لئے 8لاکھ روپے مالی امداد کی منظوری دی گئی ـاجلاس میںآئین کے آرٹیکل 245 کے تحت پاکستان آرمی کی خدمات حاصل کرنے کے لئے ریکوزیشن کی ایکس پوسٹ فیکٹو منظوری دی گئیـ اجلاس میں پنجاب لوکل گورنمنٹ ایکٹ 2019میں ترمیم کی منظوری دی گئیـاجلاس میں پنجاب ویلج،پنچائیت اور نیبرہڈکونسلز ایکٹ 2019میں ترمیم کی منظوری دی گئیـپنجاب کابینہ کوکورونا وائرس سے پیدا ہونے والی صورتحال اور حفاظتی اقدامات کے بارے میں تفصیلی بریفنگ دی گئیـاجلاس میں پنجاب کابینہ کے27 ویں اجلاس کے منٹس کی توثیق کی گئی جبکہ کابینہ سٹینڈنگ کمیٹی برائے فنانس اینڈ ڈویلپمنٹ کے 27 ویں اور 28 ویں اجلاس کے فیصلوں کی توثیق کی گئیـکابینہ اجلاس میں صوبائی وزیر اوقاف پیر سید سعید الحسن شاہ نے خصوصی دعا کرائی. صوبائی وزرائ، مشیران، معاونین خصوصی، چیف سیکرٹری اور متعلقہ محکموں کے سیکرٹریزنے اجلاس میں شرکت کی ـ
