آصف زرداری،بلاول بھٹو کا شمالی وزیرستان خودکش دھماکے میں شہادتوں پر اظہارافسوس
سابق صدر آصف علی زرداری اور چیئرمین پیپلزپارٹی بلاول بھٹو زرداری نے شمالی وزیرستان میں دہشتگردی کی مذمت کرتے ہوئے خودکش دھماکے میں سکیورٹی فورسز اور پولیس کے جوان کی شہادت پر اظہار افسوس کیا ہے ۔ اپنے ایک بیان میںآصف علی زرداری نے شمالی وزیرستان میں چیک پوسٹ پر خودکش دھماکے کی مذمت کرتے ہوئے کہا ہے کہ چیک پوسٹ پر سکیورٹی فورسز اور پولیس کے جوانوں نے دشمنوں کے ناپاک عزائم خاک میں ملائے، قوم کو ایسے بہادر بیٹوں پر فخر ہے۔آصف علی زرداری نے شہدا کے خاندانوں سے ہمدردی اور تعزیت کا اظہار کرتے ہوئے کہا ہے کہ وطن کیلئے جانیں قربان کرنے والوں کا خون رائیگاں نہیں ہوگا،انھوں نے کہا ہے کہ چیک پوسٹ پر اپنی ذمہ داریاں نبھاتے ہوئے وطن کے قابل فخر بیٹوں نے جانیں قربان کی۔بلاول بھٹو زرداری نے بھی شہدا کے خاندانوں سے ہمدردی اور تعزیت کا اظہار کیا ہے ۔ وزیر خارجہ نے خودکش دھماکے میں زخمیوں کی جلد صحت یابی کیلئے دعا کی ہے ۔ انھوں نے کہا ہے کہ وطن کی دھرتی کو وطن دشمنوں سے پاک کرنے کیلئے پر عزم ہیں، دہشت گردوں اور ان کے سرپرستوں کا عبرت ناک انجام ہوگا۔ پیپلزپارٹی کے سیکرٹری جنرل سید نیئر بخاری نے بھی شمالی وزیرستان میں دہشتگردی کی مذمت کرتے ہوئے خودکش دھماکے میں سکیورٹی فورسز اور پولیس کے جوان کی شہادت پر اظہار افسوس کیا ہے ۔ انھوں نے کہا ہے کہ محافظین وطن نے دھرتی ماں پر جانیں نچھاور کیں، شہدا کے خاندانوں سے ہمدردی اور تعزیت کا اظہار کرتے ہوئے انہوں نے زخمیوں کی جلد صحت یابی کیلئے دعا کی ہے۔
