حماس نے مراکش اسرائیل معاہدے کو مسترد کردیا
اسلامی تحریک مزاحمت (حماس)نے مراکش کی حکومت اور اسرائیل کے درمیان طے پائے نام نہاد امن معاہدے کو مسترد کر دیا ۔مرکزاطلاعات فلسطین کے مطابق حماس کے سیاسی شعبے کے سینئر رکن موسیٰ ابو مرزوق نے ایک بیان میں کہا کہ مراکش کی حکومت کا اسرائیل کے ساتھ تعلقات معمول پرلانے کا اعلان قابل مذمت اور مایوس کن ہے۔ ایک ٹویٹ میں ابو مرزوق نے کہا کہ ہم پوری شدت کے ساتھ مراکش اور اسرائیل کے درمیان طے پانے والے معاہدے کو مسترد کرتے ہیں، مراکشی حکومت کی طرف سے اسرائیل کو تسلیم کرنے کا اعلان مراکشی عوام کا فیصلہ نہیں اور نہ یہ اقدام مراکشی قوم کی اجتماعی سوچ کی عکاسی کرتا ہے۔ مراکش کی عوام آج بھی فلسطینی قوم کے حقوق اور ان کے اصولی مطالبات میں فلسطینیوںکے ساتھ کھڑی ہے۔ انہوں نے کہا کہ مراکشی وزیراعظم سعد الدین العثمانی نے اسرائیل کو تسلیم کرنے کا اعلان کرکے ہمیں دکھ پہنچایا ہے،ہم مراکش سے اسرائیل کے حوالے سے تاریخی اور باوقار موقف کی توقع رکھتے تھے مگر مراکشی حکومت نے ہمیں مایوس کیا۔ادھر حماس کے ترجمان سامی ابو زھری نے اسرائیل کیساتھ سمجھوتہ کرنے پر مراکش کو کڑی تنقید کا نشانہ بنایا۔ انہوں نے کہا کہ مراکش نے فلسطینی قوم، قضیہ فلسطین اور مراکشی قوم کو مایوس کیا ہے۔
