وزیرریلوے شیخ رشید احمد نے کہا ہے کہ میری زندگی کا مقصد ایم ایل ون ہے، اس کے بعد مستعفی ہوجائوں گا، ایم ایل ون انقلابی اقدام ہے، حکومت اسے مکمل کرے گی۔وفاقی وزیر ریلوے شیخ رشید نے مغلپورہ ڈرائی پورٹ پر نئی فریٹ ٹرین کا افتتاح کرنے کے بعد تقریب سے خطاب کرتے ہوئے کہاکہ  ایک ماہ میں 5 ڈرائی پورٹس کھولنے جا رہے ہیں، ریلوے کی ترقی ملک کی ترقی ہے، فریٹ ٹرینوں پر ٹریکر نصب کیے جائیں گے۔ انہوں نے کہا 16 ماہ میں جو مسائل ہمیں ملے کسی اور حکومت کو نہیں ملے، کوئی ہفتہ ایسا نہیں ہوتا جب حکومت کو کسی مسئلے سے نہ نمٹنا ہو، سی پیک کے خلاف کوئی سازش کامیاب نہیں ہوگی۔ انہوں نے کہا کہ کابینہ اجلاس میں آٹے کی برآمدات کے خلاف ووٹ دیا تھا، مانتا ہوں آٹا بحران پر ہم قابو نہیں پاسکے، ملک میں مضبوط پرائس کنٹرول کمیٹی ہونی چاہئے، چینی کی قیمت میں اضافے کی ذمہ داری چینی مافیا ہے۔ انہوں نے کہا کہ ٹرانسپیرنسی انٹرنیشنل کی رپورٹ جھوٹ کی آما جگاہ ہے، عمران خان ہر مشکل سے نمٹنے کی صلاحیت رکھتے ہیں، چوروں، ڈاکوئوں اور لٹیروں نے خزانے کو لوٹ لیا۔ انہوں نے کہا کہ چین پاکستان سے محبت کرنے والا ملک ہے، چین ہمارا ہے اور ہم چین کے ہیں۔ سی پیک کے خلاف کوئی سازش کامیاب نہیں ہوگی، ریلوے کی ترقی ملک کی ترقی ہے، میری زندگی کا مقصد ایم ایل ون ہے، ایم ایل ون ہر صورت مکمل ہوگا، ایم ایل ون مکمل ہونے کے بعد مستعفی ہوجائوں گا۔شیخ رشید احمد نے کہا کہ آئی ایم ایف کے پاس جانا مجبوری اور ضروری ہے،6ارب ڈالرکوئی اور دے دیتا تو آئی ایم ایف کے پاس نہ جاناپڑتا، مشکل وقت میں چین پاکستان کیشانہ بشانہ ہوگا۔ 10سال میں ہم اپنا قرض واپس کردیں گے۔انہوں نے کہا کہ شریف خاندان سے کوئی ڈیل نہیں ہوئی، انہوں نے باہر جاکر نئے ہیٹ اور کوٹ ہی تو خریدے ہیں، 2020ء الیکشن کا سال نہیں بلکہ ترقی شروع ہونے کا سال ہوگا۔ ابھی شہباز شریف کی کوئی ضرورت نہیں ،یہاں سارے کام ٹھیک چل رہے ہیں۔ جب انہیں کہوں تو وہ واپس آجائیں گے۔ ہمارے سامنے شریف قسم کی اپوزیشن ہے جو ساری لیٹی پڑی ہے، ہماری خلاف کوئی خرابی نہیں کررہا، جو کچھ خرابی کررہے ہیں ہم خود کررہے ہیں۔

تعمیراتی منصوبوں میں گرین ایریاز کے تحفظ کا خاص خیال رکھا جائے.وزیراعظم کی ہدایت