کراچی میں ٹارگٹ کلنگ اور پرتشدد کارروائیوں کا سلسلہ بدستور جاری، دو پولیس اہلکاروں سمیت چھ افراد کوقتل۔
ٹارگٹ کلنگ کا پہلا واقعہ سعید آباد میں پیش آیا جہاں نامعلوم افراد نے فائرنگ کرکے ایک شخص کو موت کے گھاٹ اتار دیا، مقتول کی شناخت نہیں ہوسکی، تاہم لاش کو ہسپتال منتقل کردیا گیا ہے۔ ادھر گارڈن میں ایک شخص کی بوری بند لاش برآمد ہوئی ہے۔ مچھ کالونی میں بھی نامعلوم افراد کی فائرنگ سے یاسین نامی شخص مارا گیاجبکہ عظیم پورہ میں ایک شخص کو قتل کردیا گیا۔ ملیر، لیاری، چاکیواڑہ اور گولیمار میں فائرنگ سے خاتون سمیت تین افراد زخمی ہوگئے۔ رات گئے ملزمان نے ناگن چورنگی پر پولیس کی موبائل وین پر فائرنگ کردی جس کے نتیجے میں دو اہلکار دم توڑ گئے۔ جاں بحق ہونے والوں میں سب انسپکٹر وزیر سولنگی اور سپاہی راشد شامل ہیں، پولیس نے واقعہ کی تحقیقات شروع کردی ہیں۔
