فطرہ اور فدیے کی کم ازکم مقدار320 روپے فی کس
سابق چیئرمین مرکزی رویت ہلال کمیٹی مفتی منیب الرحمٰن نے کہا ہےکہ فطرہ اور فدیے کی کم ازکم مقدار320 روپے فی کس ہے، فطرہ کی مقدار2 کلوچکی کے آٹے کے برابر ہوگی، اپل ثروت مالی استطاعت کے مطابق فطرہ وفدیہ ادا کریں گے انہوں نے اپنے بیان میں کہا کہ رواں سال چکی کے دو کلو آٹے کی قیمت کے برابر فطرہ اور فدیہ ادا کرنا ہوگا، جس کے حساب سے فطرہ اور فدیے کی کم ازکم مقدار320 روپے فی کس بنتی ہے۔ جبکہ مالی طور پر مستحکم اور استطاعت رکھنے والے اپنی مالی حیثیت کے مطابق فطرہ اور فدیہ کی رقم ادا کریں گے۔ مفتی منیب الرحمٰن نے کہا کہ چکی کے آٹے کے حساب سے دو کلو چکی کا آٹا اور جَو کے حساب سے چار کلو جَو فطرہ اور فدیہ دینا بنتا ہے، جَو کے حساب سے فطرہ، فدیہ کی مقدار 480 روپے ہوگی۔ کھجور پر صدقہ فطر 4 کلو ہوگا جبکہ کھجور کے حساب سے ایک روزے کا فدیہ2800 روپے ہوگا۔ درجہ اول کی کشمش کے حساب سے 4 کلو فطرہ اور ایک روزے کا فدیہ 6 ہزار400 روپے جبکہ درجہ دوم کی کشمش کے حساب سے 4 کلو فطرہ اور فی روزہ فدیہ 4 ہزار800 روپے بنے گا۔ مفتی منیب الرحمٰن کا کہنا ہے کہ روزہ توڑنے کا کفارہ 60 مساکین کو 2 وقت کا کھانا کھلانا شامل ہے۔ خیال رہے کہ صدقہ فطر عید کی نماز سے قبل ادا کرنا ضروری ہے جبکہ گھر کے سربراہ کو اپنے پیاروں یعنی بیوی اور بچوں وغیرہ کا فطرانہ بھی ادا کرنا ہوگا۔ یاد رہے پچھلے سال ماہ صیام میں صدقہ فطر اور فدیہ کی کم از کم قیمت 170 روپے مقرر کی گئی تھی۔ گندم کے 2 کلو آٹے کے حساب سے فطر کی رقم 170 روپے فی کس تھی جبکہ 4 کلو گرام جو کے حساب سے فطر کی رقم 480 روپے فی کس رکھی گئی تھی۔ علاوہ ازیں 4 کلو کھجور کے حساب سے فطر کی رقم 1600 روپے، 4 کلو کشمش درجہ اول کے حساب سے سے فطر کی رقم 2800 روپے اور 4 کلو کشمش درجہ دوم کے حساب سے فطر کی رقم 2200 روپے رکھی گئی تھی۔ مفتی منیب الرحمٰن کا کہنا تھا کہ گندم کے حساب سے یہ فطر، فدیہ اور کفارات کی کم سے کم رقم مقرر، جن حضرات کو اللہ تعالیٰ نے رزق میں کشادگی عطا کی ہے اور وافر دولت سے نوازا ہے ان پر نعمت مال کا تشکر لازم ہے اور وہ اپنی مالی حیثیت کو پیش نظر رکھتے ہوئے جو، کھجور، کشمش یا پنیر کے حساب سے فطر، فدیہ اور کفارات ادا کریں۔
