ناردرن ایریاز نے نیشنل ٹی 20 کپ کا ٹائٹل جیت لیا، بلوچستان کو شکست
اقبال اسٹیڈیم میں کھیلے جانے والے نیشنل ٹی 20 کپ کے فائنل میچ میں ناردرن ایریاز نے بلوچستان کو 52 رنز سے شکست دے کر ٹائٹل اپنے نام کرلیا۔ ناردرن ایریاز کے عمر امین کو جارحانہ اننگز کھیلنے پر فائنل میچ کا بہترین کھلاڑی قرار دیا گیا۔ ناردرن ایریاز نے پہلے بیٹنگ کرتے ہوئے مقررہ اوورز میں 5 وکٹوں کے نقصان پر 167 رنز بنائے اور بلوچستان کو جیت کے لیے 168 رنز کا ہدف دیا تھا۔ عمر امین نے 38 گیندوں پر 3 چھکوں اور 6 چوکوں کی مدد سے 60 رنز کی شاندار اننگز کھیلی، محمد نواز 31 اور شاداب خان 25 رنز بنا کر ناقابل شکست رہے۔ بلوچستان کے عماد بٹ اور حسین طلعت نے دو، دو کھلاڑیوں کو پویلین کی راہ دکھائی۔ بلوچستان کی ٹیم 168 رنز کے تعاقب میں مشکلات کا شکار رہی اور پوری ٹیم 18.2 اوورز میں 110 رنز پر ڈھیر ہوگئی، بلوچستان کے 7 کھلاڑی ڈبل فگر میں بھی داخل نہ ہوسکے، عمران فرحت 32 اور اویس ضیا 28 رنز بنا کر نمایاں رہے۔ سہیل تنویر نے تین شکار کیے، شاداب خان اور محمد نواز نے 2، 2 وکٹیں حاصل کیں۔ واضح رہے کہ نیشنل ٹی 20 کپ کے سیمی فائنلز میں ناردرن ایریاز نے کے پی اور بلوچستان نے سدرن پنجاب کو شکست دے کر فائنل تک رسائی حاصل کی تھی۔