احتساب کا عمل اب نہیں رکے گا, پاکستان تحریک انصاف نے کرپشن کے خلاف علم بلند کیا ہے۔
گورنر پنجاب چوہدری محمد سرورنے کہا ہے کہ احتساب کا عمل اب نہیں رکے گا۔ پاکستان تحریک انصاف نے کرپشن کے خلاف علم بلند کیا ہے۔وزیر اعظم عمران خان کی قیادت میں حکومت تما م کام میرٹ پر کر رہی ہے۔کرپٹ عناصر کے خلاف تمام مقدمات ہماری حکومت میں آنے سے پہلے بنے ہوئے ہیں۔ امن و امان کی صورتحال اب پہلے سے بہتر ہے۔انہوں نے کہا کہ عمران خان کی قیادت میں پاکستان میں میرٹ اور قانون کی بالا دستی، آئین کی حکمرانی اور انصاف کی فراہمی کو یقینی بنایا جائے گا۔ صحت اور تعلیم کے نظام میں عوام جلد ہی بہتر تبدیلی محسوس کریں گے۔ یہ بات انہوں نے فاؤنڈیشن ہسپتال تحصیل رجانہ میں میڈیا کے نمائندوں سے بات کرتے ہوئے کہی۔گورنر پنجاب چوہدری محمد سرور نے کہا کہ پاکستان تحریک انصاف کی حکومت بڑے مشکل فیصلے کر رہی ہے۔ ملک میں جلد ہی ترقی اور خوشحالی کا دور شروع ہوگا۔پاکستان تحریک انصاف اختیار ات اوپر سے نچلی سطح پر منتقل کر رہی ہے۔ بلدیات کا بہترین نظام لایا جا رہا ہے اور تیس فیصد بجٹ ویلیج کونسل کیلئے مختص کیا جائیگا تاکہ مقامی لوگ اپنے مسائل کے مطابق فنڈز استعمال کر سکیں۔احتساب کا نظام اب منطق انجام تک پہنچایا جائیگا۔انہوں نے کہا کہ پاکستان تحریک انصاف کی پہلی حکومت ہے جس نے اپنے آپ کو احتساب کے لیئے پیش کیااس سے قبل کسی حکومت نے اپنے آپ کو احتساب کے لیئے پیش نہیں کیا۔ انہوں نے کہا کہ پاکستان تحریک انصاف کی حکومت نے ٹیکسٹائل انڈسٹری کے لیئے گیس کی قیمتیں کم کر کے ٹیکسٹائل انڈسٹری کو نئی زندگی دی ہے جس سے نہ صرف روزگار میں اضافہ ہوگا بلکہ ایکسپورٹ میں بھی اضافہ ہوگا۔ وفاق اور صوبے ملک و قوم کی تعمیرو ترقی کیلئے باہمی رابطہ کاری کے تحت مکمل تعاون سے کام کر رہے ہیں۔گورنر پنجاب نے کہا کہ صوبہ بھر میں صاف پانی کی فراہمی کے منصوبہ جات پر کام تیز رفتاری سے جاری ہے۔ ضلع ٹوبہ ٹیک سنگھ میں الخیر فاؤنڈیشن کی جانب 18فلٹریشن پلانٹ لگائے جا رہے ہیں۔ ضلع کے ہر حلقہ میں صاف پانی کی فراہمی کے تین پلانٹ لگائے جائینگے جبکہ تحصیل رجانہ میں ایک بڑا پلانٹ لگایا جائیگا۔ضلع میں انڈسٹری کے مواقع کی فراہمی کیلئے انڈسٹریل سٹیٹ کی کوششیں جاری ہیں۔ تحصیل رجانہ میں خواتین کی پیشہ وارنہ تعلیم وتربیت کیلئے دو ہنر مند سنٹر لگائے جا رہے ہیں جن میں انفارمیشن ٹیکنالوجی، بیوٹی پارلر، کمپیوٹر سمیت دیگر ہنرمندی کے کورسز کروائے جائینگے۔ سیوریج کے نظام میں بہتری ان کی ترجیحات میں شامل ہیں۔قبل ازیں، گورنر پنجاب نے فاؤنڈیشن ہسپتال میںآؤٹ ڈور، ایمرجنسی وارڈ، فارمیسی، حامد وارڈ سمیت دیگر شعبوں کا معائنہ کیا۔ گورنر پنجاب چوہدری محمد سرور نے ہسپتال میں زیرعلاج مریضوں کی عیادت کی اور علاج معالجہ بارے دریافت کیا۔ مریضوں نے ہسپتال کی کارکردگی پر اپنے بھرپوراطمینان کا اظہار کیا۔