وزیر اعلیٰ پنجاب عثمان بزدار نے کہا ہے کہ صحت عامہ کی سہولتوں کو بہتر بنانا حکومت کی پہلی ترجیح ہے اور شعبہ صحت کو عوام کی امنگوں کے مطابق بنانے کیلئے اصلاحات کے عمل کا آغاز کر دیا گیا ہے کیونکہ مریضوں کو ہسپتالوں میں ہیلتھ کیئر کی بہترین سہولتیں ملنا ان کا حق ہے اورحکومت یہ حق مریضوں کو ہر قیمت پر دے گی اور اس مقصد کیلئے سرکاری ہسپتالوں میں معیاری طبی سہولتوں کی فراہمی کیلئے ہر ضروری اقدام اٹھایا جائے گا۔ وہ وزیراعلیٰ آفس میں مختلف وفود سے گفتگو کر رہے تھے جنہوں نے ان سے ملاقات کی۔ وزیراعلیٰ عثمان بزدار نے کہا کہ مریضوں کو علاج معالجے کی جدید سہولتوں کی فراہمی کیلئے روڈمیپ تیار کر لیا گیا ہے۔ مریضوں کو ہیلتھ کیئر کی سہولتیں دینے کیلئے وسائل ترجیحی بنیادوں پر فراہم کریں گے اورہیلتھ کیئر سسٹم کے روایتی نظام کو بدلنے کیلئے اصلاحات پر عملدرآمد کو یقینی بنایا جائے گا تاکہ عام آدمی کو علاج معالجے کی معیاری سہولتیں مل سکیں۔ انہوں نے کہا کہ اصلاحاتی پروگرام سے ہیلتھ کیئر کی سہولتوں کی بہتری پر دورس نتائج حاصل ہوں گے۔ ہیلتھ سیکٹر میں اصلاحات کا مقصد عوام کو معیاری ، بہترین اور جدید طبی سہولتوں کی فراہمی ہے ۔ وزیر اعلیٰ نے کہا کہ شعبہ صحت کی بہتری کیلئے ہسپتالوں میں چیک اینڈ بیلنس کا موثر نظام وضع کیا جائے گا اورجدید طبی سہولتوں کی فراہمی کیلئے مختص کردہ خطیر رقم کے ثمرات عام آدمی تک پہنچائیں گے۔ انہوں نے کہا کہ ہسپتالوں میں دکھی انسانیت کے زخموں پر مرہم رکھنے کے لئے محنت اور جذبے سے کام کرنا ہو گا۔ شعبہ طب ایک مقدس پیشہ ہے اور مسیحائی کا درجہ رکھتا ہے۔مسیحائی کے پیشے سے وابستہ لوگ دین اور دنیا دونوں کماتے ہیں۔ عثمان بزدار نے کہا کہ دکھی انسانیت کی خدمت ایک عبادت ہے اورکسی کے زخمو ں پر مرہم رکھنا نیک کام ہے۔ وزیر اعلیٰ نے کہا کہ بہترین علاج معالجہ عام آدمی کا حق ہے اور یہ حق عوام کو دینے میں کوئی کسر اٹھا نہیں رکھی جائے گی۔ انہوں نے کہا کہ عوام کو معیاری طبی سہولتو ں کی فراہمی کے ساتھ ساتھ معیاری ادویات کی فراہمی کو بھی یقینی بنایا جا رہا ہے۔ صوبے میں ادویات کی خریداری کے عمل، تقسیم اور ترسیل کے نظام کو جدید خطوط پر استوار کیا جائے گا۔

نامعلوم افراد کی فائرنگ سے ایک شخص جاں بحق