مثالی گاؤں کا تحت ہر دیہات کو مکمل طورپر ڈویلپ کیا جائے گا۔مریم نوازشریف

وزیراعلیٰ پنجاب مریم نواز شریف کی زیر صدارت ایک خصوصی اجلاس منعقد ہوا، جس میں "مثالی گاؤں"، "ستھرا پنجاب" اور "ویسٹ ٹو ویلیو" منصوبوں پر تفصیلی بریفنگ دی گئی۔ اجلاس میں پنجاب بھر میں 1200 دیہات کو مثالی گاؤں بنانے کے جامع منصوبے پر پیش رفت کا جائزہ لیا گیا۔ اجلاس کو بتایا گیا کہ ہر مثالی گاؤں میں 24 گھنٹے واٹر سپلائی، مکمل سیوریج نیٹ ورک اور ویسٹ مینجمنٹ ٹریٹمنٹ پلانٹ قائم کیے جائیں گے۔ اس کے ساتھ ساتھ پختہ گلیاں، سڑکوں کی بحالی، بچوں کے پارک، شجر کاری، گھروں پر نمبرنگ اور سائن بورڈز کی تنصیب بھی شامل ہے۔ وزیراعلیٰ مریم نواز شریف کو سولر سسٹم سے چلنے والے واٹر سپلائی ماڈل اور سیوریج سسٹم پر بھی بریفنگ دی گئی۔ بریفنگ میں بتایا گیا کہ پائلٹ فیز کے تحت 130 دیہات میں ترقیاتی منصوبے کامیابی سے مکمل کیے جا چکے ہیں۔ مریم نواز شریف نے منصوبے کی جلد از جلد تکمیل کے لیے متعلقہ حکام سے ڈیڈ لائن طلب کر لی۔ انہوں نے واضح کیا کہ "مثالی گاؤں منصوبے میں عوام کی ضروریات کو مدنظر رکھ کر ترجیحات طے کی جائیں گی اور ہر دیہات کو مکمل طور پر ڈویلپ کیا جائے گا۔" وزیراعلیٰ نے متعلقہ اداروں کو ہدایت کی کہ منصوبے پر تیزی سے کام کیا جائے تاکہ دیہی علاقوں کے عوام کو جدید سہولیات کی فراہمی جلد ممکن ہو سکے۔