وزیر اعلیٰ سندھ مراد علی شاہ نے سندھ اسمبلی اجلاس کے دوران 2 روپے کا ذکر کر کے ارکان کو حیران کر دیا۔تفصیلات کے مطابق وزیر اعلیٰ سندھ نے اسمبلی اجلاس سے خطاب میں کہا کہ لوگ اسمبلی سے اشیا غائب ہونے کا الزام لگاتے ہیں، میں کل 2 روپے ایوان میں چھوڑ کر گیا تھا، آج بھی یہیں رکھے ہیں۔مراد علی شاہ کا کہنا تھا کہ دو روپے تو موجود ہیں لیکن اب یہ دیکھا جائے کہ کل اور آج کون اس ایوان میں نہیں ہیں۔دریں اثنا، سندھ اسمبلی نے آیندہ مالی سال 20-2019 کا بجٹ منظور کر لیا ہے، وزیر اعلیٰ نے کہا کہ رواں مالی سال ہم نے 7 ارب روپے کی بچت کی ہے۔اجلاس میں 11 کھرب 86 ارب 50 کروڑ روپے سے زائد کے 159 مطالباتِ زر منظور کیے گئے، سندھ اسمبلی میں اپوزیشن کی 543 کٹوتی کی تحریکیں مسترد ہوئیں۔بعد ازاں اسپیکر نے سندھ اسمبلی کا اجلاس کل صبح 11 بجے تک ملتوی کر دیا۔یاد رہے گزشتہ روز اسمبلی میں اظہار خیال کرتے ہوئے وزیر اعلیٰ نے کہا تھا کہ میں ساری زندگی وزیر اعلیٰ نہیں رہوں گا، کل کیا ہوگا، اللہ ہی جانتا ہے، جب تک پارٹی اور ایوان چاہے گا، اس منصب پر رہوں گا۔