بیلٹ پیپرز پر غلطیاں ،الیکشن کمیشن نے سندھ کے بعض وارڈز میں پولنگ ملتوی کردی
الیکشن کمیشن نے سندھ کے بعض وارڈز میں بیلٹ پیپرز پر غلط امیدواروں کے نام پرنٹ ہونے پر پولنگ ملتوی کردی۔ ترجمان الیکشن کمیشن کے مطابق سندھ کے بلدیاتی انتخابات میں چند وارڈز کے بیلٹ پیپرزپر امیدواروں کے نام غلط پرنٹ ہوئے جس وجہ سے بعض وارڈز میں پولنگ ملتوی کردی گئی ۔ ترجمان نے کہا کہ ان کیٹیگری آف سیٹس پر دوبارہ الیکشن کے لیے الیکشن کمیشن نیا شیڈول جاری کرے گا۔ترجمان کے مطابق الیکشن کمیشن نے بیلٹ پیپرز پر غلط نام شائع ہونے کی انکوائری کاحکم دے دیا ہے۔ دوسری جانب نواب شاہ میں پولنگ اسٹیشن نادرشاہ ڈسپنسری میں غلط انتخابی نشانوں پر امیدوار وں نے شدید احتجاج کیا۔تحریک لبیک کے امیدوار نے کہاکہ بیلٹ پیپرپر کرین کے انتخابی نشان کے بجائے ان کی تصویر چھاپی گئی جبکہ نواب شاہ میں یونین کونسل تین وارڈ تین میں آزاد امیدوار نے غلط انتخابی نشان چھپنے پر احتجاج کیا۔ آزاد امیدوار نے بتایا کہ بیلٹ پیپر پر اس کا انتخابی نشان پنکھے کے بجائے تالا چھپا ہوا ہے۔پریذائیڈنگ افسر نے غلط انتخابی نشان والے پولنگ سٹیشنوں پر پولنگ کو روک دیا ہے۔
