اسلام آباد : چین کے نائب صدر وانگ کشان آج پاکستان پہنچیں گے، دورے کے دوران وانگ کشان صدر ڈاکٹر عارف علوی اور وزیر اعظم عمران خان سے ملاقاتیں کریں گے جبکہ مختلف شعبوں میں دو طرفہ تعاون بڑھانے کے لیے معاہدوں اور مفاہمتی یاداشتوں پر پاکستان اور چین دستخط کریں گے۔ تفصیلات کے مطابق چین کے نائب صدر وانگ کشان آج پاکستان پہنچ رہے ہیں ، وہ 26 سے 28 مئی تک پاکستان میں قیام کریں گے۔ دفتر خارجہ کے مطابق وانگ کشان چائنہ کمیونسٹ پارٹی کے خارجہ امور کے کلیدی رکن ہیں، چینی نائب صدر کا دورہ پاکستان اور چین کے درمیان اعلی سطحی تبادلوں کو جاری رکھنا ہے۔ ترجمان کے مطابق نومبر 2018 اور حالیہ دوسرے بیلٹ اینڈ روڈ فورم میں وزیراعظم کی شرکت کے بعد سے اعلی سطحی تبادلوں میں مزید تیزی آئی ہے۔ چینی نائب صدر وانگ کشان اپنے دورہ پاکستان میں صدر ڈاکٹر عارف علوی اور وزیر اعظم عمران خان سے ملاقاتیں کریں گے،مختلف شعبوں میں دو طرفہ تعاون بڑھانے کے لیے معاہدوں اور مفاہمتی یاداشتوں پر پاکستان اور چین دستخط کریں گے۔