ہمارے کسی ملک کے خلاف جارحانہ عزائم نہیں ہیں، پاکستان ایک ذمہ دار ایمٹی طاقت ہے; وزیر اعظم عمران خان
اسلام آباد:نیشنل کمانڈ اینڈ کنٹرول اتھارٹی کا اجلاس وزیر اعظم عمران خان کی زیرصدارت ہوا۔نیشنل کمانڈ اینڈ کنٹرول اتھارٹی کے اجلاس میں چیئرمین جوائنٹ چیفس آف سٹاف کمیٹی جنرل زبیر محمود حیات، آرمی چیف جنرل قمر جاوید باجود ،پاک فضائیہ، پاک بحریہ، حساس اداروں کے سربراہان اور وزیر خارجہ شاہ محمود قریشی، وزیر دفاع پرویز خٹک اور دفاعی پیداوار کے وزرا کے علاوہ کمانڈ اتھارٹی کے ممبر وزرا، ڈی جی آئی ایس آئی، ڈی جی ایس پی ڈی شریک تھے۔ ذرائع نے بتایا کہ ڈی جی اسٹریٹجک پلانز ڈویژن جنرل سرفراز ستار نے پاکستان کی جوہری صلاحیت پر بریفنگ دی۔شرکا نے کمانڈ اینڈ کنٹرول سسٹم پر مکمل اعتماد اور بھارتی دراندازی کے جواب میں پاکستانی ردعمل پر اطمینان کا اظہار کیا۔ذرائع نے بتایا کہ وزیراعظم عمران خان نے بروقت جوابی کارروائی پر پاک فضائیہ کی تعریف کی۔اس موقع پر عمران خان کا کہنا تھا کہ پاکستان اپنے دفاع کا حق محفوظ رکھتا ہے۔ ان کا کہنا تھا کہ قوم کو پاک فوج کی صلاحیتوں پر پورا بھروسہ ہے، حکومت، فوج اور عوام سب ایک پیج پر ہیں۔وزیراعظم نے کہا کہ ہمارے کسی ملک کے خلاف جارحانہ عزائم نہیں ہیں، پاکستان ایک ذمہ دار ایمٹی طاقت ہے۔ذرائع کا مزید کہنا تھا کہ اجلاس میں عسکری قیادت نے پاک فوج کی پیشہ ورانہ تیاریوں پر بریفنگ دی۔بریفنگ میں بتایا گیا کہ پاک فوج کی پیشہ وارانہ تیاریاں ہر لحاظ سے مکمل ہیں۔اجلاس میں پاک فضائیہ کے بدھ کو کیے گئے آپریشن پر اطمینان کا اظہار کیا گیا جب کہ اجلاس میں موجودہ پاک بھارت کشیدگی کی صورتحال پر غور کیا گیا۔فوج کی جانب سے وزیر اعظم کو پاک بھارت کشیدہ صورتحال پر تفصیلی بریفنگ دی گئی جب کہ بھارت کی جانب سے وقتا فوقتا لائن آف کنٹرول کی خلاف ورزی سے بھی آگاہ کیا گیا۔پاک بھارت کشیدہ صورتحال کے بعد نیشنل کمانڈ اینڈ کنٹرول اتھارٹی کا اجلاس طلب کیا گیا تھا۔نیشنل کمانڈاینڈ کنٹرول اتھارٹی کے اجلاس میں پاک بھارت کشیدگی کے پیش نظر اہم فیصلے کیے گئے۔ میڈیا رپورٹ کے مطابق نیشنل کمانڈ اجلاس میں فیصلہ کیا گیا ہے کہ پاکستانی حدود میں بھارتی دراندازی کا فوری اور موثرجواب دیا جائے گا۔وزیراعظم عمران خان نے ایک بار پھرپاک افواج کی کارکردگی کو سراہااورپاک فضائیہ کو ایل او سی پرکی جانیوالی کارروائی پر خراج تحسین پیش کیا،گزشتہ روز قومی سلامتی اجلاس میں نیشنل کمانڈ اتھارٹی کا اجلاس بلانے کی منظوری دی گئی تھی۔
