وفاقی وزیر برائے سائنس و ٹیکنالوجی آغا حسن بلوچ پاکستان میں قازقستان کے سفیر یرژان کسٹانفین سے وزارت سائنس و ٹیکنالوجی میں ملاقات کی
وفاقی وزیر برائے سائنس و ٹیکنالوجی آغا حسن بلوچ پاکستان میں قازقستان کے سفیر یرژان کسٹانفین سے وزارت سائنس و ٹیکنالوجی میں ملاقات کی۔ وفاقی وزیر نے قازقستان کے سفیر کا خیرمقدم کرتے ہوئے کہا کہ پاکستان قازقستان کے ساتھ تعلقات کو بہت اہمیت دیتا ہے۔ اور باہمی دلچسپی کے مختلف شعبوں میں دوطرفہ تعاون کو مزید وسعت دینا چاہتا ہے۔ انہوں نے دونوں ممالک کے درمیان تعاون کے لئے موجود مواقع پر روشنی ڈالی۔ وفاقی وزیر نے قازقستان کے ساتھ وسیع البنیاد اور گہرے تعلقات کی خواہش کا اظہار کیا۔ آغا حسن بلوچ نے کہا کہ جلد ہی گوادر تجارتی مرکز ہو گا اور گوادر بندرگاہ کی ترقی کے ذریعے لینڈ لاک ریپبلکز دنیا تک رسائی حاصل کر سکیں گے،جس سے پورے خطے میں سماجی و اقتصادی بہتری آئے گی۔ انہوں نے بلوچستان کے معدنی وسائل سے مالا مال ہونے اور وہاں معدنی شعبے کو ترقی دینے کی حکمت عملی کا بھی ذکر کیا۔ وفاقی وزیر سائنس و ٹیکنالوجی اور قازقستان کے سفیر نے سائنس اور ٹیکنالوجی کے شعبے میں تعاون کے لیے مشترکہ تحقیقی کونسل کے لیے مفاہمت کی یادداشت پر دستخط کرنے کے عمل پر تبادلہ خیال کیا جس پر اگلے چند ماہ میں دستخط ہونے کا امکان ہے۔ پاکستان اور قازقستان کے درمیان بڑھتے ہوئے تعاون پر اطمینان کا اظہار کرتے ہوئے وفاقی وزیر نے کہا کہ ہم نوجوان نسل کے درمیان تعاون کو فروغ دینے کی حوصلہ افزائی کرتے ہیں اور سائنس اور ٹیکنالوجی ہی مستقبل ہے ۔ اس سلسلے میں الفارابی یونیورسٹی قازقستان اور نسٹ کے درمیان ایک مفاہمتی یادداشت کا معاملہ بھی پائپ لائن میں ہے۔ آغا حسن بلوچ نے کہا مفاہمتی یادداشت کے بعد ممستقبل کے عمل درآمد کا منصوبہ بھی پیش کیا جائے گا تاکہ دونوں ادارے مفاہمتی یادداشت میں تجویز کردہ حکمت عملی پر کام کر سکیں۔ قازقستان کے سفیر ایچ ای یرژان کسٹانفین نے وفاقی وزیر کو شاعر مشرق ڈاکٹر محمد اقبال کے فلسفے اور خدمات پر قازقستان میں منعقد ہونے والے ایک بین الاقوامی سیمنار کے بارے میں آگاہ کیا۔ انہوں نے اس سال ایکسپو سینٹر، قازقستان میں ہونے والی تجارتی سمٹ کا بھی ذکر کیا جہاں پاکستانی کمپنیوں نے قازقستان کی بزنس کمیونٹی کو اپنی مصنوعات کی نمائش کی۔ انہوں نے پاکستان کے ساتھ سائنس اور مختلف اقتصادی شعبوں میں دوطرفہ تعلقات کو بڑھانے کی ضرورت پر زور دیا۔ سفیر نے کہا کہ دنیا کے نقشے پر پاکستان ایک اہم مقام رکھتا ہے اور اس مقام سے بھرپور فائدہ اٹھانے کے لیے تمام ممکنہ عملی اقدامات کیے جائیں گے۔ وفاقی وزیر نے کہا کہ سائنسی تحقیق میں تعاون ممالک کی صلاحیتوں میں اضافے کا سنگ بنیاد ثابت ہو سکتا ہے۔ انہوں نے اس سلسلے میں تمام ممکنہ اقدامات کے لیے وزیر اعظم کے عزم کی تعریف کی۔ سفیر نے وفاقی وزیر برائے سائنس و ٹیکنالوجی کو سووینئرز پیش کیے۔ جوائنٹ سیکرٹری اور ٹیکنکل ایڈوائزر وزارت سائنس و ٹیکنالوجی جناب زین العابدین نے بھی اجلاس میں شرکت کی۔
