بجلی کا شارٹ فال 7 ہزار میگاواٹ، ملک بھرمیں لوڈ شیڈنگ کا دورانیہ 16 گھنٹے تک ہو گیا
پاور ڈویژن کے مطابق ملک بھرمیں بجلی کا شارٹ فال ساڑھے 7 ہزار ميگاواٹ تک پہنچ گيا ہے، جس کے باعث ملک کے مختلف علاقوں میں لوڈ شیڈنگ کا دورانیہ بھی 16 تک جاپہنچا ہے۔تفصیلات کے مطابق گرمی کی شدت بڑھنے سے ملک میں بجلی کی قلت بھی بڑھ گئی ہے، جس کے بعد ملک بھر میں لوڈشیڈنگ کا دورانیہ بھی بڑھ گیا ہے۔پاور ڈویژن کے مطابق ملک میں توانائی بحران برقرار ہے، ملک میں بجلی کی کل طلب 29 ہزار 200میگاواٹ اور بجلی کی مجموعی پیداوار 21 ہزار 700 میگاواٹ ہے جبکہ بجلی کا شارٹ فال 7 ہزار 500 میگاواٹ تک پہنچ گیا ہے۔ذرائع کا کہنا ہے کہ ملک کے مختلف علاقوں میں 16 گھنٹے تک لوڈشیڈنگ کی جارہی ہے، دیہات اور زیادہ نقصانات والے علاقوں میں شارٹفال اس سے زیادہ ہے، گرمی بڑھنے سے دن کے اوقات میں شارٹفال میں مزید اضافے کا خدشہ ہے۔اس کے علاوہ کراچی کے علاقے گڈاپ سٹی میں بجلی کی لوڈشیڈنگ کا دورانیہ 18 گھنٹے تک بڑھ گیا ہے،جبکہ شاہ فیصل کالونی، ملیر، سرجانی ٹاؤن، جہانگیر روڈ، گلستان جوہر، گارڈن، سلطان آباد، کالا پل سمیت شہر کے مختلف علاقوں میں بجلی کی طویل اور غیر اعلانیہ لوڈ شیڈنگ کا سلسلہ جاری ہے اور شہر کے اکثر علاقوں میں لوڈشیڈنگ کا دورانیہ 4 سے 14 گھنٹے تک پہنچ گیا ہے۔دوسری جانب پنجاب کےمختلف شہروں میں بھی 6 سے8 گھنٹے کی لوڈشیڈنگ جاری ہے جب کہ دیہات میں بجلی چندگھنٹے ہی آتی ہے۔
A
