وزیر خارجہ شاہ محمود قریسی نے اعلان کیا ہے کہ اسلام آباد نے نئی دہلی کی بھارتی وزیر اعظم نریندر مودی کے لیے فضائی حدود استعمال کرنے کی درخواست مسترد کردی۔بھارتی حکومت نے 28 اکتوبر کو پاکستان سے بھارتی وزیر اعظم کے 29 اکتوبر کو سعودی عرب میں ہونے والے عالمی کاروباری کانفرنس کے لیے فضائی حدود استعمال کرنے کی درخواست کی تھی۔وزیر خارجہ نے ایک بیان میں کہا ہے کہ 'یہ فیصلہ آج کے یوم سیاہ اور مقبوضہ جموں و کشمیر میں انسانی حقوق کی سنگین خلاف ورزیوں کے تناظر میں کیا گیا ہے'۔انہوں نے کہا کہ بھارتی ہائی کمشنر کو تحریری طور پر اس فیصلے سے آگاہ کیا جارہا ہے۔وزیر اعظم عمران خان بھی 28 اکتوبر کو ریاض میں ہونے والے اس ہی کانفرنس میں شرکت کے لیے جائیں گے۔واضح رہے کہ پاکستان نے ستمبر کے مہینے میں بھی نریندر مودی کے جرمنی کے سفر کے لیے پاکستانی فضائی حدود استعمال کرنے کی بھارتی درخواست کو مسترد کردیا تھا۔وزیر خارجہ شاہ محمود قریشی کا کہنا تھا کہ ‘پاکستان نے مقبوضہ کشمیر کی صورت حال، ہندوستان کا رویہ، جو ظلم و بربریت اور وہاں جو حق تلفی ہورہی ہے اس کو سامنے رکھتے ہوئے فیصلہ کیا ہے کہ ہم ہندوستان کے وزیر اعظم کو اجازت نہیں دیں گے’۔

ذرائع کا کہنا تھا کہ پاکستان عالمی قوانین کے تحت پابند ہے کہ وہ بھارتی وزیراعظم کو فضائی حدود استعمال کرنے کی اجازت دے اگر اس کو مسترد کردیا گیا تو بھارت انٹرنیشنل سول ایوی ایشن آرگنائزیشن سے اپیل کرسکتا ہے جس کے نتیجے میں پاکستان کو بھاری جرمانہ بھی ادا کرنا پڑسکتا ہے۔