پاکستان مسلم لیگ (ن) کی ترجمان مریم اورنگزیب نے کہا ہے کہ عمران صاحب صرف لاہور نہیں پنجاب کا دورہ کر کے لاہور آئیے گا، استاد، ڈاکٹرز سمیت پورا پنجاب احتجاج پر ہے، وہاں سے ہو کر آئیے گا۔ انہوں  نے وزیراعظم کے دورہ لاہور پر بیان میں کہا ہے کہ عمران صاحب نواز شریف کا لاہور ملتان، اور ملتان سکھر موٹر وے ایک سال سے تیار ہے افتتاح کر کے آئیے گا، شہباز شریف کی اورنج ٹرین تیار ہے چلوا کے آئیے گا، پنجاب کے لوگ نواز شریف اور شہباز شریف کو یاد کرتے ہیں تسلی دے کر آنا۔مریم اورنگزیب کا کہنا تھا عمران صاحب پنجاب میں نواز شریف کا صحت کارڈ کا اجرا بند ہے، شروع کروا کے آئیے گا، ڈینگی کے مریضوں کی تعداد 70 ہزار سے زیادہ ہوگئی ہے، نالائق وزیر اعلی کا استعفی لے کر آئیے گا، لاہور میں پھیلے کچرے کے ڈھیروں کی صفائی کرا کے آئیے گا، ہسپتالوں میں غریب عوام کے لئے مفت دوائیاں، ٹیسٹ اور علاج بند ہے، اسے دوبارہ شروع کرا کے آئیے گا۔