مقبوضہ کشمیرمیں بھارتی فوجیوں کہ ریاستی دہشتگردی ،ضلع بڈگام میں 2 نوجوان شہید
مقبوضہ کشمیرمیں بھارتی فوجیوں نے اپنی ریاستی دہشت گردی کی تازہ کارروائی کے دوران آج ضلع بڈگام میں دو اور کشمیری نوجوانوں کو شہید کردیاجس سے جمعہ سے شہید ہونیوالے کشمیریوں کی تعداد بڑھ کر 23ہو گئی ہے۔فوجیوں نے ضلع کے علاقے چھتر گام میں تلاشی اور محاصرے کی ایک کارروائی کے دوران ایک مکان کو تباہ کر کے ان نوجوانوں کو شہید کیا۔ قابض انتظامیہ نے بڈگام میں انٹرنیٹ سروس معطل کر دی۔ضلع میں نوجوانوں کی شہادتوں پر زبردست احتجاجی مظاہرے کئے گئے ۔ نوجوانوں کی بڑی تعداد نے گھروں سے نکل کر سڑکوںپربھارتی فورسز کے مظالم کے خلاف مظاہرے کئے۔ فوجیوں نے چھتر گام میں مظاہرین کو منتشر کرنے کیلئے پیلٹ گنز اور آنسو گیس کا بے دریغ استعمال کیا جس سے متعدد افراد زخمی ہو گئے ۔
کشمیریونیورسٹی کے سینکڑوں طلباء نے سرینگر میں دونوں شہید نوجوانوں کی غائبانہ نماز جنازہ ادا کی ۔ طلباء نے یونیورسٹی کیمپس میں مارچ کیا اور آزادی کے حق میں اور بھارت کے خلاف نعرے بلند کئے۔
