ملک میں سورج قہر ڈھانے لگا، درجہ حرارت میں اچانک 6 سے 7 ڈگری سینٹی گریڈ اضافے کا امکان

محکمہ موسمیات نے خبردار کیا ہے کہ آئندہ چند روز کے دوران ملک کے بیشتر علاقوں میں شدید گرمی کی لہر برقرار رہے گی، جبکہ درجہ حرارت معمول سے کئی ڈگری زیادہ رہنے کا امکان ہے۔ تفصیلات کے مطابق اسلام آباد، پنجاب اور بلوچستان میں موسم گرم اور خشک رہنے کی پیشگوئی کی گئی ہے۔ شہریوں کو شدید گرمی کے دوران احتیاط برتنے کی ہدایت کی گئی ہے۔ خیبرپختونخوا میں درجہ حرارت معمول سے 6 ڈگری سینٹی گریڈ زیادہ ہونے کا امکان ہے، جو گرمی کی شدت میں مزید اضافے کا سبب بنے گا۔ ادھر سندھ میں سورج مزید قہر ڈھانے لگا،  پارہ معمول سے 7 ڈگری سینٹی گریڈ زیادہ ریکارڈ کیے جانے کا امکان ہے۔ ماہرین نے سندھ کے شہریوں کو ہیٹ ویو سے خاص طور پر محتاط رہنے کی تلقین کی ہے۔جبکہ کشمیر اور گلگت بلتستان جیسے نسبتاً ٹھنڈے علاقوں میں بھی موسم گرم اور خشک رہنے کی توقع ظاہر کی گئی ہے۔محکمہ موسمیات نے تمام متعلقہ اداروں کو گرمی سے بچاؤ کے اقدامات یقینی بنانے کی ہدایت کی ہے جبکہ عوام کو مشورہ دیا گیا ہے کہ غیر ضروری طور پر دھوپ میں نکلنے سے گریز کریں، پانی کا استعمال بڑھائیں اور ہلکے لباس پہنیں۔